Hindistonda O‘zbek tili va hind-o‘zbek ilmiy-madaniy aloqalari markazi ochildi

Hindistonning Dehli universitetida O‘zbek tili va hind-o‘zbek ilmiy-madaniy aloqalari markazi ochildi, deb xabar bermoqda “Dunyo” axborot agentligi.

Qayd etilishicha, markaz Toshkent davlat sharqshunoslik universiteti va Dehli universiteti o‘rtasida erishilgan kelishuvlar doirasida tashkil etilgan. “O‘zbek tili va hind-o‘zbek ilmiy-madaniy aloqalari markazi” faoliyatining asosiy maqsadi hindistonlik talabalarga o‘zbek tilini o‘rgatish, madaniy-ma’rifiy aloqalarni rivojlantirish va ushbu sohada qo‘shma ilmiy izlanishlar olib borishga qaratilgan.

Dehli universiteti vitse-kansleri markaz ochilishidagi nutqida ikki mamlakatlar xalqlari o‘rtasidagi madaniy-ma’rifiy aloqalar ko‘p asrlik tarixga ega ekanini qayd etib, mazkur ochilgan markaz ikki xalq o‘rtasida ta’lim sohasidagi qadimgi rishtalarga hissa qo‘shishiga ishonch bildirgan. Bundan tashqari erishilgan kelishuvlar ikki universitet ilmiy jamoatchiligi tomonidan amalga oshiriladigan qo‘shma ilmiy loyihalar, o‘qituvchilar va talabalar almashinuvi, qo‘shma ta’lim dasturlari orqali mutaxassislar tayyorlash ishlari uchun huquqiy asos bo‘lishiga alohida urg‘u bergan.

Mamlakat elchisi Dilshod Axatov Hindistonning eng yetakchi oliy ta’lim dargohlarining yana birida o‘zbek tili kurslarining yo‘lga qo‘yilishi ikki davlat xalqlari o‘rtasidagi mavjud do‘stlik rishtalarini mustahkamlashini ta’kidlagan. Yangi ochilgan markaz faoliyatini tashkil etishda ko‘rsatilgan ko‘mak va faollik uchun TDSHU va Dehli universiteti rahariyatiga minnatdorchilik bildirgan.

O‘zbek tili va hind-o‘zbek ilmiy madaniy aloqalari markazi uchun Sharqshunoslik universiteti hamda O‘zbekistonning Hindistondagi elchixonasi tomonidan o‘zbek tili, adabiyoti, madaniyati, tarixi va zamonaviy taraqqiyoti haqidagi ma’lumotlarni qamrab olgan kitoblar, badiiy adabiyotlar, jurnallar, o‘quv-ko‘rgazma qo‘llanmalari to‘plami taqdim etilgan.

Shu kunning o‘zida o‘zbek tilini o‘rganuvchi talabalar uchun TDSHU rektori Gulchehra Rixsiyeva boshchiligida mahorat darslari ham o‘tib berilgan.

Ma’lumot uchun, Dehli universiteti o‘zbek tili bo‘yicha o‘quv kurslari mavjud bo‘lgan Hindistondagi uchinchi oliy ta’lim muassasasiga aylandi. Bunga qadar 2004-yildan boshlab Dehli shahridagi Jomiya Milliya Islomiya universitetida hamda 2021-yildan boshlab Javaharlal Neru universitetida o‘zbek tili kurslari faoliyat yuritib kelmoqda.