Samarqandda kelin qaynonasini g‘isht bilan urib o‘ldirdi

Samarqand viloyatida oilaviy kelishmovchilik sabab kelib chiqqan janjalda kelin qaynonasini g‘isht bilan urib o‘ldirdi. Bu haqda “Daryo”ga Bosh prokuratura matbuot xizmati xabar qildi.

Qayd etilishicha, 19-oktabr kuni soat 19:30 larda Urgut tumani IIBga “Chag‘izmon” mahallasida yashovchi fuqaro Sh.F. ariza murojaat qilgan. U o‘z murojaatida shu kuni soat 19:00 larda onasi M.R. (1977-yilda tug‘ilgan)ning yashash uyiga borganini, eshikdan chaqirgan vaqtida hech kim javob bermagani sababli uyga kirganda onasining murdasi tan jarohatlari bilan yotganini ma’lum qilgan.

Voqea joyiga viloyat prokuraturasi rahbariyati, Samarqand viloyat IIB rahbariyati va Urgut tuman prokurori, Urgut tuman IIB rahbariyati hamda tezkor tergov guruhi to‘liq tarkibda yetib kelgan.

Holat yuzasidan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.

Surishtiruv ishlari davomida marhuma M.R. bilan kelini M.Q. o‘rtasida kelishmovchilik kelib chiqqani aniqlangan. Janjal vaqtida gumonlanuvchi M.Q. yashash hovlisidan g‘isht bo‘lagini olib, M.R.ning bosh qismiga urib, tan jarohati yetkazgan. Shundan so‘ng marhuma voqea joyida vafot etgan.

Gumonlanuvchi M.Q. (1996-yilda tug‘ilgan) Urgut tumani “So‘fiyon” MFYda yashovchi otasi A.Q.ning yashash uyiga ketib qolgani aniqlanib, ushlangan.