Toshkent shahrining Mirzo Ulug‘bek va Zangiota tumanlarida kir yuvish kukunlarini qo‘lbola usulda tayyorlab sotish holatlari fosh etildi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departamentning Mirzo Ulug‘bek tuman bo‘limi tomonidan tezkor tadbir o‘tkazilgan. Unda fuqarolar P.U. va A.O‘. bir qator taniqli savdo belgilaridan foydalangan holda kontrafakt kir yuvish kukunlari ishlab chiqarayotgani aniqlangan.
Ular har biri 3 kilogrammdan bo‘lgan qo‘lbola usulda qadoqlangan 3 149 dona kir yuvish kukunini fuqaro U.P.ga 5 300 dollarga sotgan vaqtida ashyoviy dalillar bilan ushlangan.
Shuningdek, departamentning Zangiota tuman bo‘limi tomonidan Davlat soliq inspeksiyasi xodimlari bilan hamkorlikda tezkor tadbir o‘tkazilgan. Unda fuqarolar M.X. va D.X. “A.K.” MCHJga tegishli noturar binoning bir qismini o‘zaro kelishuv asosida ijaraga olib, yashirin sex tashkil qilib, turli savdo belgilaridan foydalangan holda kontrafakt kir yuvish kukunlarining savdosi bilan shug‘ullanib kelgani aniqlangan.
Ushbu sexdan 13 050 kilogramm tuz, 2 653 kilogramm qo‘lbola usulda tayyorlangan kir yuvish kukuni, 2 157 dona idish va boshqa tovar moddiy boyliklar ashyoviy dalil sifatida olingan.
Mazkur holatlar yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)