Сергели тумани ҳокимлиги 19 ноябрь куни қурилиш майдонида кран қулаб тушгани юзасидан муносабат билдирди.
Туман ҳокимлиги вакиллари воқеа жойига бориб, вазият билан танишди. Қурилиш бўйича иш бошқарувчи И.Норалиевнинг берган маълумотига кўра, эрталаб қурилиш объекти кўздан кечирилаётганда ёғингарчилик натижасида ер юмшаши туфайли краннинг ерга чўкиш ҳолати аниқланган. Бунинг хавфлилигини билган бошқарувчи кранни демонтаж қилиш зарурлигини айтган.
Соат 09:00 да техник хизмат кўрсатиш фирмаси томонидан краннинг демонтаж ишлари бошланган ва краннинг ўзи ерга чўкиши оқибатида демонтаж жараёнида қулаб тушган. Шунингдек, «Кранда одам борлиги ҳақида айтилмоқда» деган исботланмаган маълумот ҳам тарқатилган. Туман матбуот хизмати бир кун олдин ушбу кранни бошқарган 1995 йилда туғилган И.Мадиев билан юзма-юз суҳбатда бўлди.
Кран бошқарувчисининг сўзларига кўра, ҳақиқатдан ҳам бир кун олдин у кранни бошқарган. Аммо бугун эрталабки демонтаж ишлари туфайли кранга чиқмаган ва умуман бошқармаган. Иш бошқарувчи И.Норалиев ҳозирда ҳудуднинг 90 фоизи хавфсиз ҳолатда эканини айтиб, ёғингарчиликдан сўнг ишчилар ўз ишларини давом эттириши, йиқилган кран эса утилизация қилинишини таъкидлади.
Ҳозирда ФВВ, Ички ишлар ходимлари ва Сергели тумани ҳокимлигининг масъул вакиллари вазиятни тўлиқ ўз назоратига олган.
Шунингдек, Қурилиш вазирлиги ҳам содир бўлган ҳодиса юзасидан маълумот берди. Унга кўра, «Чоштепа» МФЙ Жўнариқ кўчаси манзилида жойлашган 16 қаватли турар жой биноларини қуриш объекти бўйича Вазирлар Маҳкамасининг 2018 йил 18 майдаги «Архитектура ва қурилиш соҳасида давлат хизматлари кўрсатишнинг маъмурий регламентларини тасдиқлаш тўғрисида»ги 370-сонли қарорига асосан шаҳар Қурилиш бош бошқармаси Лойиҳа-смета ҳужжатларини келишиш бўйича Архитектура ва шаҳарсозлик кенгаши ишчи органи томонидан хулоса берилган.
«Complex graphics» МЧЖ лойиҳа ташкилоти томонидан ишлаб чиқилган ишчи лойиҳани «Шаҳарсозлик ҳужжатлари экспертизаси» ДУК кўриб чиқиб, йиғма эксперт хулосаси олинган. Вазирлар Маҳкамасининг 2022 йил 20 апрелдаги қарорига асосан шаҳар Қурилиш соҳасида ҳудудий назорат инспекциясидан ўрнатилган тартибда хабарнома юбориш йўли билан қурилиш-монтаж ишлари бошлаш учун рўйхатдан ўтган.
Инспекция томонидан қурилиш объектида мониторинг ишлари ўтказилган бўлиб, «Омега агро строй» МЧЖнинг қурилиш ишлари бўйича масъул ходимларига қурилишда йўл қўйилаётган камчиликлар, қурилиш даврида юритилиши керак бўлган ижро ҳужжатлари ўз вақтида юритилмаётгани ҳамда «Қурилишда хавфсизлик техникаси»нинг қурилиш майдонида меҳнат муҳофазаси ва техника хавфсизлиги қоидаларига риоя этилиши юзасидан «Давлат назорати» электрон тизим платформаси орқали кўрсатмалар берилган.
Инспекция томонидан 19 ноябрда қурилиш майдонидаги минора кранини демонтаж қилинаётган вақтда қулагани юзасидан жойига чиқиб ўрганилганда қурилиш объекти, қурилиш қатнашчилари ва кран бошқарувчисига ҳеч қандай жароҳат етмагани аниқланган. Ҳозирда ушбу ҳолат бўйича ишчи гуруҳ ўрганиш ишларини олиб бормоқда.
Мавзуга доир: Тошкентдаги қурилиш майдонида кран қулаб тушди (видео)
Изоҳ (0)