Farg‘ona vodiysidagi avtomobillarga gaz to‘ldirish shoxobchalarida navbatlar kamaygani kuzatilmoqda. Bu haqda “Daryo” muxbiri Azizbek Abduvaliyev xabar bermoqda.
Metan gaz zapravkalarida navbatlarning kamayishi kechagi kundan, ya’ni 18-noyabrdan boshlangan. Haydovchilar oldinlari mashinaga gaz to‘ldirish uchun o‘rtacha 1 soat vaqt sarflagan bo‘lsa, hozirda bu jarayon ko‘pi bilan 20-30 daqiqaga cho‘zilayotganini aytmoqda. Bu holatdan Farg‘ona viloyatining ayrim tumanlari istisno bo‘lib qolmoqda: ularda hali-hamon turnaqator navbatlar kuzatilmoqda.
“Daryo” muxbiri bilan suhbatda bo‘lgan mutasaddilarning bildirishicha, vodiyda gaz bosimining biroz barqarorlashgani shoxobchalarda joriy etilgan cheklovlar o‘z samarasini berayotgani bilan bog‘liq. Hozirda bu cheklovlar o‘rtacha 12 soatni tashkil etmoqda.
Qolaversa, oldinroq avariyaviy to‘xtatilgan Ohangarondagi kompressor stansiyasi gaz haydab berish agregati ham faoliyatini to‘liq tiklagan. Shuningdek, Andijon viloyatining Xo‘jaobod tumanidagi gaz saqlash omboridan viloyatlarga tabiiy gaz yetkazib berish hajmi ham sezilarli darajada oshirilgan.
Izoh (0)