Ijtimoiy tarmoqlarda Toshkent shahri Yashnobod tumanida 10 dan ortiq daraxt kesib tashlangani haqida xabar tarqaldi. Davlat ekologiya qo‘mitasi holatga munosabat bildirdi.
Qayd etilishicha, Yashnobod tumanidagi “Iltifot” mahallasi hududidagi qurilish obyektida daraxtlarning noqonuniy kesilayotgani bo‘yicha kelib tushgan ma’lumotga asosan Toshkent shahar Ekologiya va atrof-muhitni muhofaza qilish boshqarmasi, Yashnobod tuman hokimligi, tuman prokuraturasi, tuman ichki ishlar bo‘limi hamda Milliy gvardiya xodimlari bilan hamkorlikda o‘rganish o‘tkazilgan.
O‘rganishlar davomida qurilish tashkiloti hududi ko‘zdan kechirilganda 16 tup turli qimmatbaho daraxtlarning noqonuniy ravishda tag qismidan kesib tashlangani aniqlangan.
Ushbu holat bo‘yicha O‘zbekiston Respublikasining “O‘simlik dunyosini muhofaza qilish va undan foydalanish to‘g‘risida”gi qonunining 37-moddasi talablari buzilib, o‘simlik dunyosiga ko‘p miqdorda zarar yetkazilgan.
Dastlabki hisob-kitoblarga ko‘ra o‘simlik dunyosiga yetkazilgan zarar miqdori 3 milliard 514 million 200 ming so‘mni tashkil etmoqda.
O‘rganish natijasi bo‘yicha to‘plangan materiallar tegishli tartibda rasmiylashtirilib, tuman prokuraturasiga taqdim etilgan.
Izoh (0)