Фарғона водийсидаги автомобилларга газ тўлдириш шохобчаларида навбатлар камайгани кузатилмоқда. Бу ҳақда «Дарё» мухбири Азизбек Абдувалиев хабар бермоқда.
Метан газ заправкаларида навбатларнинг камайиши кечаги кундан, яъни 18 ноябрдан бошланган. Ҳайдовчилар олдинлари машинага газ тўлдириш учун ўртача 1 соат вақт сарфлаган бўлса, ҳозирда бу жараён кўпи билан 20-30 дақиқага чўзилаётганини айтмоқда. Бу ҳолатдан Фарғона вилоятининг айрим туманлари истисно бўлиб қолмоқда: уларда ҳали-ҳамон турнақатор навбатлар кузатилмоқда.
«Дарё» мухбири билан суҳбатда бўлган мутасаддиларнинг билдиришича, водийда газ босимининг бироз барқарорлашгани шохобчаларда жорий этилган чекловлар ўз самарасини бераётгани билан боғлиқ. Ҳозирда бу чекловлар ўртача 12 соатни ташкил этмоқда.
Қолаверса, олдинроқ авариявий тўхтатилган Оҳангарондаги компрессор станцияси газ ҳайдаб бериш агрегати ҳам фаолиятини тўлиқ тиклаган. Шунингдек, Андижон вилоятининг Хўжаобод туманидаги газ сақлаш омборидан вилоятларга табиий газ етказиб бериш ҳажми ҳам сезиларли даражада оширилган.
Мавзуга доир: Совуқ тушса, шу бўлар такрор: Ўзбекистондаги метан заправкалардаги чеклов турнақатор навбатларни юзага келтирмоқда (фото)
Изоҳ (0)