“Nimanidir cheklash haqida topshiriq bermaganman. Nomimdan kimlar ish qilgan bo‘lsa, ularga qonuniy chora ko‘riladi” — Oila va xotin-qizlar qo‘mitasi raisi Zulayho Mahkamova

Kecha, 17-noyabr kuni “Daryo” muxbiri Musulmonbek Ibrohimov Oila va xotin-qizlar qo‘mitasi binosini rasmga olayotganda Milliy gvardiya xodimlari qarshilik qilgani va bu qo‘mita raisi Zulayho Mahkamova tomonidan rasmga olishga qo‘yilgan cheklov sabab bo‘lgani aytilgan edi. Bunday topshiriq haqiqatan ham qo‘mita raisi tomonidan berilganini qo‘mita matbuot kotibi Nilufar Jumayeva ham tasdiqlagandi.

Shuningdek, qo‘mita matbuot kotibi “Daryo” muxbiriga og‘zaki so‘rovni qabul qilmasligi, faqat xat orqali javob berilishini va bu topshiriqni ham qo‘mita raisi shaxsan o‘zi berganini ma’lum qilgandi.

Yuqoridagi ikki holat amaldagi qonunlarga zid ekanligi haqida material e’lon qilgan edik.

Bugun, 18-noyabr kuni Oila va xotin-qizlar qo‘mitasi raisi Zulayho Mahkamova “Daryo” muxbiri bilan uchrashib, yuzaga kelgan masalaga oydinlik kiritdi.

Qo‘mita raisining aytishicha, uning tomonidan nimanidir cheklash haqida noqonuniy topshiriq berilmagan, xodimlar rais nomidan gapirib, noto‘g‘ri harakat qilgan.

“Biz hech qachon binoni rasmga yoki videoga olishga taqiq qo‘ymaganmiz. Milliy gvardiya xodimlariga shartnomada ko‘rsatilgan vazifalardan tashqari vazifa qo‘yishga haqqimiz yo‘q. Boisi ular boshqa tuzilma xodimlari. Mening nomimdan fuqarolar, OAV xodimlariga noqonuniy talab qo‘ygan Milliy gvardiya xodimlariga chora ko‘rish uchun ularning rahbariyatiga xat bilan murojaat qilamiz”, — dedi qo‘mita raisi.

Mahkamova xonim OAV tomonidan berilgan so‘rovlarni faqat yozma xat ko‘rinishida talab qilish masalasiga to‘xtalar ekan, bunday talab hech qachon o‘rtaga tashlanmaganini alohida ta’kidladi.

“Mening nomimdan noto‘g‘ri narsani talab qilgan matbuot kotibimizga qonuniy chora ko‘rishni so‘rab, Axborot va ommaviy kommunikatsiyalar agentligiga murojaat qilamiz. Biz hamisha jamoatchilik uchun ochiqmiz, faoliyatimizga oid har qanday qonuniy ma’lumotlarni berishga tayyormiz”, — dedi Zulayho Mahkamova.

Milliy gvardiya matbuot kotibi Davron Jumanazarov holat yuzasidan “Daryo”ga izoh berdi.

“Hozirda ushbu holat Milliy gvardiya Qo‘riqlash bosh boshqarmasi tomonidan nazoratga olinganligini, ma’lumotda keltirilgan xodimlarning xatti-harakatlariga huquqiy baho berish maqsadida xizmat tekshiruvi tayinlanganligini ma’lum qilamiz”, — deyiladi gvardiya axborotida.

“Daryo” voqealar rivojini kuzatib boradi.