Qoraqalpog‘istonning Mo‘ynoq tumanida joylashgan Hokim ota Sulaymon Boqirg‘oniy ziyoratgohi hududida madaniy meros obyekti aniqlandi. Bu haqda Bosh prokuratura xabar qildi.
Qayd etilishicha, Berdaq nomidagi Qoraqalpoq davlat universiteti “Arxeologiya” kafedrasi bir guruh olimlari va talabalari tomonidan arxeologik ekspeditsiya o‘tkazilgan. Jarayon davomida XII-XIV asrlarga tegishli madaniy meros obyekti topilgan.
Aniqlangan devor g‘ishtlari va metall buyumlar olimlar tomonidan Xorazmshohlar va Oltin O‘rda davriga xosligi, ya’ni Sulaymon Boqirg‘oniy yashagan davr va undan keyingi davrlarga to‘g‘ri kelishi taxmin qilinmoqda.
Maqbarada olib borilgan arxeologik qazish ishlari natijasida ochilgan obyektning hozirgi holatini konservatsiya qilmasdan tabiiy va jismoniy ta’sirlardan muhofaza qilish, ziyoratchilar va turistlarga qulay shart-sharoitlar yaratish, shuningdek kelajak avlodga yodgorlikni butun holida yetkazish maqsadida obyektda yengil konstruksiyali metall qoplama bostirma qurish ishlari boshlangan.
Qurilish ishlari joriy yilning dekabr oyida yakunlanishi rejalashtirilgan.
Izoh (0)