«Ниманидир чеклаш ҳақида топшириқ бермаганман. Номимдан кимлар иш қилган бўлса, уларга қонуний чора кўрилади» — Оила ва хотин-қизлар қўмитаси раиси Зулайҳо Маҳкамова

Кеча, 17 ноябрь куни «Дарё» мухбири Мусулмонбек Иброҳимов Оила ва хотин-қизлар қўмитаси биносини расмга олаётганда Миллий гвардия ходимлари қаршилик қилгани ва бу қўмита раиси Зулайҳо Маҳкамова томонидан расмга олишга қўйилган чеклов сабаб бўлгани айтилган эди. Бундай топшириқ ҳақиқатан ҳам қўмита раиси томонидан берилганини қўмита матбуот котиби Нилуфар Жумаева ҳам тасдиқлаганди.

Шунингдек, қўмита матбуот котиби «Дарё» мухбирига оғзаки сўровни қабул қилмаслиги, фақат хат орқали жавоб берилишини ва бу топшириқни ҳам қўмита раиси шахсан ўзи берганини маълум қилганди.

Юқоридаги икки ҳолат амалдаги қонунларга зид эканлиги ҳақида материал эълон қилган эдик.

Бугун, 18 ноябрь куни Оила ва хотин-қизлар қўмитаси раиси Зулайҳо Маҳкамова «Дарё» мухбири билан учрашиб, юзага келган масалага ойдинлик киритди.

Қўмита раисининг айтишича, унинг томонидан ниманидир чеклаш ҳақида ноқонуний топшириқ берилмаган, ходимлар раис номидан гапириб, нотўғри ҳаракат қилган.

«Биз ҳеч қачон бинони расмга ёки видеога олишга тақиқ қўймаганмиз. Миллий гвардия ходимларига шартномада кўрсатилган вазифалардан ташқари вазифа қўйишга ҳаққимиз йўқ. Боиси улар бошқа тузилма ходимлари. Менинг номимдан фуқаролар, ОАВ ходимларига ноқонуний талаб қўйган Миллий гвардия ходимларига чора кўриш учун уларнинг раҳбариятига хат билан мурожаат қиламиз», — деди қўмита раиси.

Маҳкамова хоним ОАВ томонидан берилган сўровларни фақат ёзма хат кўринишида талаб қилиш масаласига тўхталар экан, бундай талаб ҳеч қачон ўртага ташланмаганини алоҳида таъкидлади.

«Менинг номимдан нотўғри нарсани талаб қилган матбуот котибимизга қонуний чора кўришни сўраб, Ахборот ва оммавий коммуникациялар агентлигига мурожаат қиламиз. Биз ҳамиша жамоатчилик учун очиқмиз, фаолиятимизга оид ҳар қандай қонуний маълумотларни беришга тайёрмиз», — деди Зулайҳо Маҳкамова.

Миллий гвардия матбуот котиби Даврон Жуманазаров ҳолат юзасидан «Дарё»га изоҳ берди.

«Ҳозирда ушбу ҳолат Миллий гвардия Қўриқлаш бош бошқармаси томонидан назоратга олинганлигини, маълумотда келтирилган ходимларнинг хатти-ҳаракатларига ҳуқуқий баҳо бериш мақсадида хизмат текшируви тайинланганлигини маълум қиламиз», — дейилади гвардия ахборотида.

«Дарё» воқеалар ривожини кузатиб боради.