Nensi Pelosi AQSH Kongressining Vakillar palatasida Demokratik partiya fraksiyasiga boshqa rahbarlik qilmasligini bildirdi, deb xabar beradi CNN.
Oraliq saylovlardan keyin quyi palatada ko‘pchilik o‘rinni respublikachilar egallashi ma’lum bo‘lganidan keyin Pelosi bu qarori haqida e’lon qildi. Shu tariqa u Kongress spikeri lavozimidan ajralardi, ammo demokratik ozchilik yetakchiligiga da’vogarlik qilishi mumkin bo‘lardi.
Pelosi demokratlarga “yangi avlod” rahbarlik qiladigan vaqt kelganini aytdi. “Shunchalik ko‘p odamlar bu ulkan mas’uliyatni o‘z zimmasiga olishga tayyorligidan minnatdorman”, — deya qo‘shib qo‘ydi u. Shu bilan birga, 82 yoshli Pelosi Kongressda ishlashda davom etishini ma’lum qildi.
Pelosi yangi tarkibdagi Kongress 2023-yil yanvarida ish boshlaguniga qadar spiker lavozimida qoladi. 2022-yil noyabrida bo‘lib o‘tgan Kongress deputatlari oraliq saylovida Pelosi yana bir muddatga qayta saylangandi.
Nensi Pelosi birinchi marta 2003-yilda AQSH parlamenti quyi palatasida demokratlar yetakchisiga aylangan edi. U Amerikaning ikkita asosiy partiyalaridan birining parlament fraksiyasiga rahbarlik qilgan tarixdagi birinchi ayolga aylangan. 2007-yilda esa Pelosi parlament spikeri lavozimidagi ilk ayolga aylandi. U bu lavozimni 2011-yilgacha egallagan, so‘ng unga yana 2019-yilda, demokratlar Kongressda ko‘pchilik o‘rinni egallaganidan keyin qaytgan.
2022-yil oktabrida Nensi Pelosining turmush o‘rtog‘iga nisbatan hujum sodir etilgandi, CNN’ga bergan intervyusida u ushbu hodisa uning siyosiy karyerani davom ettirish yoki to‘xtatish haqidagi qaroriga ta’sir qilishi mumkinligini aytgandi.
Izoh (0)