Нэнси Пелоси АҚШ Конгрессининг Вакиллар палатасида Демократик партия фракциясига бошқа раҳбарлик қилмаслигини билдирди, деб хабар беради CNN.
Оралиқ сайловлардан кейин қуйи палатада кўпчилик ўринни республикачилар эгаллаши маълум бўлганидан кейин Пелоси бу қарори ҳақида эълон қилди. Шу тариқа у Конгресс спикери лавозимидан ажраларди, аммо демократик озчилик етакчилигига даъвогарлик қилиши мумкин бўларди.
Пелоси демократларга «янги авлод» раҳбарлик қиладиган вақт келганини айтди. «Шунчалик кўп одамлар бу улкан масъулиятни ўз зиммасига олишга тайёрлигидан миннатдорман», — дея қўшиб қўйди у. Шу билан бирга, 82 ёшли Пелоси Конгрессда ишлашда давом этишини маълум қилди.
Пелоси янги таркибдаги Конгресс 2023 йил январида иш бошлагунига қадар спикер лавозимида қолади. 2022 йил ноябрида бўлиб ўтган Конгресс депутатлари оралиқ сайловида Пелоси яна бир муддатга қайта сайланганди.
Нэнси Пелоси биринчи марта 2003 йилда АҚШ парламенти қуйи палатасида демократлар етакчисига айланган эди. У Американинг иккита асосий партияларидан бирининг парламент фракциясига раҳбарлик қилган тарихдаги биринчи аёлга айланган. 2007 йилда эса Пелоси парламент спикери лавозимидаги илк аёлга айланди. У бу лавозимни 2011 йилгача эгаллаган, сўнг унга яна 2019 йилда, демократлар Конгрессда кўпчилик ўринни эгаллаганидан кейин қайтган.
2022 йил октябрида Нэнси Пелосининг турмуш ўртоғига нисбатан ҳужум содир этилганди, CNN’га берган интервьюсида у ушбу ҳодиса унинг сиёсий карьерани давом эттириш ёки тўхтатиш ҳақидаги қарорига таъсир қилиши мумкинлигини айтганди.
Изоҳ (0)