Қорақалпоғистоннинг Мўйноқ туманида жойлашган Ҳоким ота Сулаймон Боқирғоний зиёратгоҳи ҳудудида маданий мерос объекти аниқланди. Бу ҳақда Бош прокуратура хабар қилди.
Қайд этилишича, Бердақ номидаги Қорақалпоқ давлат университети «Археология» кафедраси бир гуруҳ олимлари ва талабалари томонидан археологик экспедиция ўтказилган. Жараён давомида XII-ХIV асрларга тегишли маданий мерос объекти топилган.
Аниқланган девор ғиштлари ва металл буюмлар олимлар томонидан Хоразмшоҳлар ва Олтин Ўрда даврига хослиги, яъни Сулаймон Боқирғоний яшаган давр ва ундан кейинги даврларга тўғри келиши тахмин қилинмоқда.
Мақбарада олиб борилган археологик қазиш ишлари натижасида очилган объектнинг ҳозирги ҳолатини консервация қилмасдан табиий ва жисмоний таъсирлардан муҳофаза қилиш, зиёратчилар ва туристларга қулай шарт-шароитлар яратиш, шунингдек келажак авлодга ёдгорликни бутун ҳолида етказиш мақсадида объектда енгил конструкцияли металл қоплама бостирма қуриш ишлари бошланган.
Қурилиш ишлари жорий йилнинг декабрь ойида якунланиши режалаштирилган.
Изоҳ (0)