Молдова собиқ президенти уй қамоғидан озод қилинди

Молдованинг собиқ президенти Игорь Додон 2022 йил 18 ноябрь куни бўлиб ўтган суд мажлисида уй қамоғидан озод этилди. Бу ҳақда ЗДГ нашри хабар берди.

«Додонни уй қамоғида сақлаш ҳақидаги талаб рад этилсин. Шу билан бирга, у 60 кун давомида суд назорати остида бўлади. Бу вақт ичида унга мамлакатдан чиқиб кетиш тақиқланади», — дея судья ҳукмни ўқиб эшиттирди.

Молдова собиқ президенти май ойида ҳибсга олинган эди. Июнь ойида у «Энергоком»га қарши қўзғатилган жиноий иш доирасида «уюшган жиноий гуруҳлар манфаатини кўзлаб» мансаб ваколатларини суиистеъмол қилганликда айбланган.

У уйи, идоралари, ота-онасининг уйи ва бошқа биноларида узоқ давом этган тинтувлардан сўнг ҳибсга олинган. Собиқ президент Жиноят кодексининг тўрт моддаси бўйича айбланган: пассив коррупция, сиёсий партия томонидан жиноий ташкилотдан маблағ олиш, ноқонуний бойиб кетиш ва давлатга хиёнат.

Додон ва унинг партияси унга нисбатан қўзғатилган жиноий ишни президент Майя Санду томонидан сиёсий репрессия ва мухолифатга босим ўтказиш сифатида баҳоламоқда.

Игорь Додон 2006 йилдан 2009 йилгача давлат лавозимларида ишлаган, 2016 йилдан 2020 йилгача президент бўлган.