Prokuratura organlari tomonidan sport sohasiga oxirgi 3 yilda (2019—2021-yillarda) ajratilgan budjet mablag‘larining maqsadli sarflanishi o‘rganildi. Bosh prokuratura o‘rganish natijalari bo‘yicha ma’lumot berdi.
Qayd etilishicha, tekshiruvlarda 464 ta sport muassasalarida jami 27 milliard so‘m zarar aniqlangan. Mablag‘ning 10 milliard so‘mi undirilgan. Budjet mablag‘lari turli yo‘llar bilan talon-toroj qilingan.
Xususan, hududiy sport muassasalari tomonidan 20 ta holatda 8 milliard so‘mlik mablag‘lar ish haqi va boshqa to‘lovlar sifatida o‘zlashtirib olingan. Misol uchun, Farg‘ona olimpiya zaxiralari kolleji bosh hisobchisi jami 4,3 milliard so‘m mablag‘ni o‘ziga ish haqi sifatida olib, talon-toroj qilgan.
Sport muassasalarini qurish-ta’mirlash ishlarida 25 ta holatda 10 milliard so‘m budjet mablag‘lari o‘zlashtirilgan. Sport-ta’lim muassasalarini joriy ta’mirlash uchun o‘tkazilgan tanlovlarda 72 ta korrupsiyaviy holatlarga yo‘l qo‘yilgan. Masalan, Buxoro olimpiya zaxiralari kollejini joriy ta’mirlash uchun tanlovda ta’sischisi B.Q. bo‘lgan 4 ta korxona qatnashib, ularning bittasi g‘olib deb topilgan.
Sport jihozlari 8 ta holatda 4,2 milliard so‘mga qimmat narxlarda sotib olinib, mablag‘lari talon-toroj qilingan.
O‘tkazilmagan o‘quv mashg‘ulot yig‘inlari o‘tkazilgani haqida 10 ta holatda hujjatlar soxtalashtirilib, 4,3 milliard so‘m mablag‘ o‘zlashtirilgan.
Qonun buzilishi holatlari yuzasidan 1 150 ta prokuror nazorati hujjatlari qo‘llanilgan. 431 nafar shaxsning buzilgan huquqi tiklangan hamda 66 ta jinoyat ishi qo‘zg‘atilgan.
Izoh (0)