Прокуратура органлари томонидан спорт соҳасига охирги 3 йилда (2019—2021 йилларда) ажратилган бюджет маблағларининг мақсадли сарфланиши ўрганилди. Бош прокуратура ўрганиш натижалари бўйича маълумот берди.
Қайд этилишича, текширувларда 464 та спорт муассасаларида жами 27 миллиард сўм зарар аниқланган. Маблағнинг 10 миллиард сўми ундирилган. Бюджет маблағлари турли йўллар билан талон-торож қилинган.
Хусусан, ҳудудий спорт муассасалари томонидан 20 та ҳолатда 8 миллиард сўмлик маблағлар иш ҳақи ва бошқа тўловлар сифатида ўзлаштириб олинган. Мисол учун, Фарғона олимпия захиралари коллежи бош ҳисобчиси жами 4,3 миллиард сўм маблағни ўзига иш ҳақи сифатида олиб, талон-торож қилган.
Спорт муассасаларини қуриш-таъмирлаш ишларида 25 та ҳолатда 10 миллиард сўм бюджет маблағлари ўзлаштирилган. Спорт-таълим муассасаларини жорий таъмирлаш учун ўтказилган танловларда 72 та коррупциявий ҳолатларга йўл қўйилган. Масалан, Бухоро олимпия захиралари коллежини жорий таъмирлаш учун танловда таъсисчиси Б.Қ. бўлган 4 та корхона қатнашиб, уларнинг биттаси ғолиб деб топилган.
Спорт жиҳозлари 8 та ҳолатда 4,2 миллиард сўмга қиммат нархларда сотиб олиниб, маблағлари талон-торож қилинган.
Ўтказилмаган ўқув машғулот йиғинлари ўтказилгани ҳақида 10 та ҳолатда ҳужжатлар сохталаштирилиб, 4,3 миллиард сўм маблағ ўзлаштирилган.
Қонун бузилиши ҳолатлари юзасидан 1 150 та прокурор назорати ҳужжатлари қўлланилган. 431 нафар шахснинг бузилган ҳуқуқи тикланган ҳамда 66 та жиноят иши қўзғатилган.
Изоҳ (0)