Ushbu tibbiy tekshiruvlar ko‘plab xavfli kasalliklarni aniqlash va rivojlanishining oldini olishga yordam beradi, deb yozadi Marie Claire.
Yosh o‘tishi bilan immunitet pasayadi, afsuski, mavjud surunkali kasalliklarning asoratlari va yangilari paydo bo‘lishi ehtimoli ortadi. Shuning uchun 50 yoshdan keyin shifokorlar barcha ayollarni muntazam ravishda organizmni tekshirtirib turishni tavsiya qiladi.
Ko‘krak bezi saratoni skriningi
Ko‘krak bezi saratonini vaqtida aniqlash orqali bemor hayotini saqlab qolish mumkin. Shuning uchun shifokorlar 50 yoshdan oshgan ayollarga har yili mammografiyadan o‘tishni tavsiya qiladi. Shubhali bezlar paydo bo‘lmasligi uchun ko‘krakni muntazam ravishda tekshirish muhimdir.
Bachadon bo‘yni saratoni skriningi
Ko‘pgina ayollar ushbu muhim skrining tekshiruvini e’tiborsiz qoldiradi, ammo bachadon bo‘yni saratoni o‘lim darajasi yuqori bo‘lgan eng xavfli kasalliklardan biridir. Qayg‘uli oqibatlar ko‘pincha bemorlar o‘z vaqtida tekshiruvdan o‘tmaganligi sababli yuzaga keladi. Kolposkopiya bachadon bo‘yni o‘smalarini tashxislash uchun ishlatiladi.
To‘liq gormonal tekshiruv
Organizmdagi darajalari yillar davomida o‘zgarib turadigan asosiy gormonlar estrogen va testosterondir. Biroq boshqa gormonlarni ham muntazam tekshirib turgan yaxshi, ularning muvozanati metabolizm, miya, ishtaha, tana haroratiga va hokazolarga ta’sir qilishi mumkin.
Osteoporoz diagnostikasi
Yillar davomida suyaklardagi kalsiy darajasi keskin pasayishni boshlaydi va bu ko‘pincha xavfli tizimli kasallik — osteoporozga olib keladi. Kasallikni erta bosqichda aniqlash imkonini beruvchi eng samarali tekshiruv suyak densitometriyasidir (suyak zichligini o‘lchash). 50 yoshdan keyin har yili ushbu tekshiruvdan o‘tib turgan yaxshiroq.
Qon bosimini tekshirish
Menopauza va u bilan bog‘liq o‘zgarishlar tufayli ayollarda gipertoniya rivojlanishi juda keng tarqalgan. Agar u nazorat ostida bo‘lmasa, xavfli yurak-qon tomir patologiyalari vujudga kelishi mumkin.
Qonda shakar va xolesterin miqdorini aniqlash
Qonda glyukoza darajasini tekshirish ikkinchi toifa diabetni aniqlashga yordam beradi, bu ko‘pincha 40-50 yoshdan keyin tashxis qilinadi. Yomon xolesterin (LDL) uchun o‘z vaqtida va muntazam ravishda qon tahlilini topshirish infarkt va insultning sababi bo‘lgan ateroskleroz (tomirlarning devorlarida blyashka shakllanishi) rivojlanishining oldini oladi.
Izoh (0)