Ушбу тиббий текширувлар кўплаб хавфли касалликларни аниқлаш ва ривожланишининг олдини олишга ёрдам беради, деб ёзади Marie Claire.
Ёш ўтиши билан иммунитет пасаяди, афсуски, мавжуд сурункали касалликларнинг асоратлари ва янгилари пайдо бўлиши эҳтимоли ортади. Шунинг учун 50 ёшдан кейин шифокорлар барча аёлларни мунтазам равишда организмни текширтириб туришни тавсия қилади.
Кўкрак бези саратони скрининги
Кўкрак бези саратонини вақтида аниқлаш орқали бемор ҳаётини сақлаб қолиш мумкин. Шунинг учун шифокорлар 50 ёшдан ошган аёлларга ҳар йили маммографиядан ўтишни тавсия қилади. Шубҳали безлар пайдо бўлмаслиги учун кўкракни мунтазам равишда текшириш муҳимдир.
Бачадон бўйни саратони скрининги
Кўпгина аёллар ушбу муҳим скрининг текширувини эътиборсиз қолдиради, аммо бачадон бўйни саратони ўлим даражаси юқори бўлган энг хавфли касалликлардан биридир. Қайғули оқибатлар кўпинча беморлар ўз вақтида текширувдан ўтмаганлиги сабабли юзага келади. Колпоскопия бачадон бўйни ўсмаларини ташхислаш учун ишлатилади.
Тўлиқ гормонал текширув
Организмдаги даражалари йиллар давомида ўзгариб турадиган асосий гормонлар эстроген ва тестостерондир. Бироқ бошқа гормонларни ҳам мунтазам текшириб турган яхши, уларнинг мувозанати метаболизм, мия, иштаҳа, тана ҳароратига ва ҳоказоларга таъсир қилиши мумкин.
Остеопороз диагностикаси
Йиллар давомида суяклардаги кальций даражаси кескин пасайишни бошлайди ва бу кўпинча хавфли тизимли касаллик — остеопорозга олиб келади. Касалликни эрта босқичда аниқлаш имконини берувчи энг самарали текширув суяк денситометриясидир (суяк зичлигини ўлчаш). 50 ёшдан кейин ҳар йили ушбу текширувдан ўтиб турган яхшироқ.
Қон босимини текшириш
Менопауза ва у билан боғлиқ ўзгаришлар туфайли аёлларда гипертония ривожланиши жуда кенг тарқалган. Агар у назорат остида бўлмаса, хавфли юрак-қон томир патологиялари вужудга келиши мумкин.
Қонда шакар ва холестерин миқдорини аниқлаш
Қонда глюкоза даражасини текшириш иккинчи тоифа диабетни аниқлашга ёрдам беради, бу кўпинча 40-50 ёшдан кейин ташхис қилинади. Ёмон холестерин (ЛДЛ) учун ўз вақтида ва мунтазам равишда қон таҳлилини топшириш инфаркт ва инсультнинг сабаби бўлган атеросклероз (томирларнинг деворларида бляшка шаклланиши) ривожланишининг олдини олади.
Изоҳ (0)