Qozog‘iston Yevrosiyo taraqqiyot banki (YTB) portfelidagi 4,2 foiz ulushini Rossiyadan sotib olishni ko‘rib chiqmoqda. Bu haqda mamlakat moliya vaziri Yerulan Jamavbayev ma’lum qildi.
Uning so‘zlariga ko‘ra, bitim qiymati 25-30 milliard tengegacha (taxminan 54-65 million dollar) bo‘lishi mumkin.
Muzokaralar davom etmoqda. Yiliga taxminan 7 milliard tengedan bir necha yil to‘lov qilinadi. Umumiy summa 25-30 milliard tengeni tashkil qiladi. Raqamlar ko‘rib chiqiladi. Bu dastlabki holat, — deydi Jamavbayev.
Hozirgi vaqtda Rossiya YTB aksiyalarining 65,97 foiziga, Qozog‘iston 32,99 foiziga, Belarusga 1 foizga yaqin ulushiga egalik qiladi. Qolgan ulush esa Tojikiston, Armaniston va Qirg‘izistonga tegishli.
Yerulan Jamavbayev 16-avgust kuni Qozog‘istonning Rossiyadan YTB ulushining bir qismini sotib olishga qiziqishi haqida ma’lum qilgandi. Biroq, keyin bu kelishuv bo‘yicha yakuniy qaror hali qabul qilinmaganiga aniqlik kiritildi.
9-avgust kuni Bloomberg manbalariga tayanib, Rossiya bank sanksiyalar ostida qolmasligi uchun YTBdagi ulushini nazorat ostidan Qozog‘iston foydasiga kamaytirish niyatida ekanligini ma’lum qildi. Bank matbuot xizmati o‘shanda vaziyatga izoh berishdan bosh tortgan.
O‘zbekistonning YTB aksiyadorlari bo‘lgan mamlakatlarga kirish jarayoni 2022-yilda yakunlanishi mumkin. Fevral oyida ham O‘zbekiston bank a’zoligiga tayyorlanayotgani haqida xabar berilgan edi.
Yevrosiyo taraqqiyot banki 2006-yil yanvar oyida Rossiya va Qozog‘iston tomonidan o‘z a’zolarining bozor iqtisodiyotini rivojlantirish, ularning barqaror iqtisodiy o‘sishi va o‘zaro savdo-iqtisodiy aloqalarini kengaytirish maqsadida tashkil etilgan xalqaro moliya tashkilotidir.
Izoh (0)