Sentabr oyida rossiyaliklar xorijiy banklardagi omonatlariga rekord miqdorda 6,7 milliard dollar o‘tkazdi, bu avgust oyidagiga nisbatan chorak baravar ko‘p. Bu haqda “RIA Novosti” xabar bermoqda.
Shu bilan birga, yil boshidan buyon fuqarolarning xorijdagi omonatlari miqdori ikki barobar ortib, birinchi marta 60 milliard dollardan oshdi.
Joriy yilning yanvar oyi holatiga ko‘ra, rossiyaliklar chet el banklarida qariyb 30,6 milliard dollar saqlagan. Ukrainada urush boshlanishi bilan fuqarolar xorijga mablag‘larni faol o‘tkaza boshlagan.
Fevral oyida xorijiy banklarga 4,3 milliard dollarga yaqin mablag‘ omonatga qo‘yildi, bu o‘sha paytda kamida 2018-yildan beri eng yuqori ko‘rsatkich edi.
Bahorda mamlakat markaziy banki tomonidan xorijga pul mablag‘larini olib chiqishga cheklovlar joriy etilishi fonida bunday operatsiyalar hajmi sezilarli darajada kamaydi: mart oyida fuqarolar 1,7 milliard dollar, aprelda 1,4 milliard dollar, may oyida esa 1,7 dollarni depozit qo‘ygan.
May oyining o‘rtalarida regulyator chet elga pul o‘tkazmalari bo‘yicha cheklovlarni yumshatdi, buning natijasida rossiyaliklarning xorijiy banklar foydasiga operatsiyalari hajmi uch barobarga oshib, 5,2 milliard dollarga yetdi.
Iyuldan boshlab rossiyaliklar xorijga bir million dollargacha pul o‘tkazishga muvaffaq bo‘ldi va hisob raqamlariga 5,6 milliard dollar o‘tkaza oldi.
Sentabr oyida esa xorijiy omonatlarga o‘tkazmalar rekord darajaga yetgan — 6,7 milliard dollar. Natijada rossiyaliklarning xorijdagi omonatlari 9 oy ichida ikki barobarga oshib, 63,1 milliard dollarga yetdi.
Avvalroq yil boshidan beri O‘zbekiston banklarida hisob raqami ochgan rossiyaliklar soni ma’lum qilingani haqida xabar berilgandi.
Izoh (0)