Қозоғистон Евросиё тараққиёт банки (EТБ) портфелидаги 4,2 фоиз улушини Россиядан сотиб олишни кўриб чиқмоқда. Бу ҳақда мамлакат молия вазири Ерулан Жамавбаев маълум қилди.
Унинг сўзларига кўра, битим қиймати 25-30 миллиард тенгегача (тахминан 54-65 миллион доллар) бўлиши мумкин.
Музокаралар давом этмоқда. Йилига тахминан 7 миллиард тенгедан бир неча йил тўлов қилинади. Умумий сумма 25-30 миллиард тенгени ташкил қилади. Рақамлар кўриб чиқилади. Бу дастлабки ҳолат, — дейди Жамавбаев.
Ҳозирги вақтда Россия EТБ акцияларининг 65,97 фоизига, Қозоғистон 32,99 фоизига, Беларусга 1 фоизга яқин улушига эгалик қилади. Қолган улуш эса Тожикистон, Арманистон ва Қирғизистонга тегишли.
Ерулан Жамавбаев 16 август куни Қозоғистоннинг Россиядан EТБ улушининг бир қисмини сотиб олишга қизиқиши ҳақида маълум қилганди. Бироқ, кейин бу келишув бўйича якуний қарор ҳали қабул қилинмаганига аниқлик киритилди.
9 август куни Bloomberg манбаларига таяниб, Россия банк санкциялар остида қолмаслиги учун EТБдаги улушини назорат остидан Қозоғистон фойдасига камайтириш ниятида эканлигини маълум қилди. Банк матбуот хизмати ўшанда вазиятга изоҳ беришдан бош тортган.
Ўзбекистоннинг EТБ акциядорлари бўлган мамлакатларга кириш жараёни 2022 йилда якунланиши мумкин. Февраль ойида ҳам Ўзбекистон банк аъзолигига тайёрланаётгани ҳақида хабар берилган эди.
Евросиё тараққиёт банки 2006 йил январь ойида Россия ва Қозоғистон томонидан ўз аъзоларининг бозор иқтисодиётини ривожлантириш, уларнинг барқарор иқтисодий ўсиши ва ўзаро савдо-иқтисодий алоқаларини кенгайтириш мақсадида ташкил этилган халқаро молия ташкилотидир.
Изоҳ (0)