Vengriyaning eng yirik banklaridan biri — OTP Bank O‘zbekistondagi “Ipoteka bank”ni sotib olish bo‘yicha jarayonni qayta boshladi. Bu haqda Vengriya bankining moliyaviy direktori Laslo Benchik ma’lum qildi.
Biz jarayonni qayta boshladik, yana bir tasdiqlovchi tekshiruvdan o‘tmoqdamiz. Kelishuvni amalga oshirish ehtimoli yuqori deb o‘ylaymiz, — deydi OTP Bank moliyaviy direktori.
Uning ta’kidlanishicha, “Ipoteka bank”da investitsiyalar uchun jozibadorlik o‘sgan. Yil boshidan beri “Ipoteka bank” 750 mlrd so‘mga yaqin sof foyda olgan.
Vengriya bosh vaziri Viktor Orban ham Samarqandda bo‘lib o‘tgan Turkiy Davlatlar Tashkiloti sammiti oldidan mazkur jarayon haqida gapirib o‘tgandi.
Biz O‘zbekiston prezidenti va hukumati bilan biznes imkoniyatlarini muhokama qildik. OTPga yaqinda muhim o‘zbek bankini sotib olishini e’lon qilish imkonini beruvchi kelishuvga yaqinmiz”, — deydi Orban.
Vengriyaning OTP Bank’i “Ipoteka bank”ni xususiylashtirishda ishtirok etishi 2021-yilning kuzida ma’lum bo‘lgan edi. Shartnoma 2022-yil boshida imzolanish kutilgan edi. Keyinchalik bank sotib olish jarayonini kechiktirishga qaror qilgandi.
OTP Group — moliyaviy, sug‘urta, investitsiya va bank biznesi sohalarida aktivlarni boshqarish va lizingdan pensiyani moliyalashtirishgacha bo‘lgan Vengriya bank guruhi. Bu Markaziy va Sharqiy Yevropadagi asosiy moliyaviy xizmatlar provayderlaridan biridir. Vengriyadagi eng yirik bank bo‘lgan OTP Bank guruhning asosini tashkil qiladi.
Izoh (0)