Kreml Polshaga raketa kelib tushishi bilan bog‘liq vaziyatda AQSH va NATOni “bosh sabab” deb hisoblaydi. Rossiya prezidenti matbuot kotibi Dmitriy Peskov shu tariqa AQSHning raketa qulashi voqeasi uchun Rossiyani yakuniy javobgar deb e’lon qilganiga munosabat bildirdi. Bu haqda “RIA Novosti” xabar bermoqda.
“Amerikaliklar ‘agar u narsa bo‘lmaganida edi, bu narsa ham bo‘lmasdi’ degan paradigma haqida aytmoqda. Unda ortga nazar tashlashda mantiq bor. Shunda hamma narsaning bosh sababini ko‘ramiz — uning boshida NATO va AQSH turibdi”, — dedi Kreml vakili.
AQSH va NATOning aynan qaysi harakatlari ushbu vaziyatga sababchi bo‘lganiga u aniqlik kiritmadi.
15-noyabr kuni Polsha OAVlari Ukraina bilan chegara yaqinidagi Lyublinsk viloyatining Pshevoduv qishlog‘iga ikkita raketa qulagani haqida xabar berdi. Raketalardan biri elevatorga kelib tushdi, oqibatda ikki kishi halok bo‘ldi. Shu kuni Rossiya Ukraina hududiga yoppasiga raketa zarbasi bergandi.
Ukraina hukumati Polshadagi hodisada Rossiyani javobgar qildi. Moskva ayblovlarni rad etmoqda. G‘arb mamlakatlari va Polsha hukumati raketa Ukrainaga tegishli bo‘lgani haqidagi versiyaga moyillik bildirmoqda. Polsha prezidenti Anjey Duda “baxtsiz hodisa” yuz berganini taxmin qildi. Uning so‘zlariga ko‘ra, katta ehtimol bilan, qulagan raketa Ukraina havo hujumiga qarshi mudofaasi tomonidan qo‘llanilgan.
AQSH, Germaniya va Buyuk Britaniya ham Polsha raketa qulashi bilan bog‘liq hodisa uchun yakunda Ukraina bilan urush boshlagan va mamlakat fuqarolik infratuzilmasini o‘qqa tutgan Rossiya mas’ul ekanligi haqidagi bayonotlar bilan chiqdi.
Izoh (0)