Kanada OAVlarida Xitoy Xalq Respublikasi raisi Si Szinpin va Kanada bosh vaziri Jastin Tryudo o‘rtasida Indoneziyadagi G20 sammitida bo‘lib o‘tgan maxfiy suhbat mazmuni haqida xabarlar paydo bo‘lganidan keyin, Szinpin Tryudoni “noloyiq ish qilganlikda” aybladi. Bu haqda CBC xabar bermoqda.
“Biz muhokama qilgan hamma narsa gazetalarga tarqalib ketdi, bu nomaqbul narsa, biz bu haqda gaplashmaganmiz”, — dedi Si ikki tomonlama suhbatdan keyin ertasi kuni forumda Tryudoni uchratib.
Tryudo, o‘z navbatida, “Kanadada ochiqcha va halol muloqotga ishonishlarini” aytdi hamda Kanada va Xitoy bir yoqadan bosh chiqarmaydigan masalalar borligiga qaramasdan, tomonlar konstruktiv tarzda birgalikda ishlashda davom etishiga umid bildirdi. Shundan keyin Si: “Keling, avval buning uchun sharoitlar yaratamiz”, — dedi. Ular qo‘l siqishdi va bir-biridan uzoqlashdi.
Tryudo va Si 15-noyabr kuni uchrashgandi, Sining boshqa yetakchilar bilan suhbatlaridan farqli ravishda, bu uchrashuv norasmiy bo‘lgandi. Keyinroq Kanada bosh vaziri matbuot xizmati press-reliz chiqarib, muloqot chog‘ida tilga olingan mavzular haqida xabar berdi (ular orasida Ukrainadagi urush ham bor), ammo Sining ushbu masalalar bo‘yicha pozitsiyasiga aniqlik kiritmadi.
OAVlar xabarlarida aytilishicha, XXR rahbari va Kanada bosh vaziri Ukrainadagi urushni, Shimoliy Koreyaga nisbatan siyosatni va Xitoyning Kanadadagi saylovlarga ehtimoliy aralashuvi haqidagi masalani muhokama qilgan.
Yakuniy matbuot anjumanida Tryudo o‘z xatti-harakatlarini “Kanada aholisiga o‘z harakatlari haqida ochiq gapirishdan uyalmasligi” bilan izohladi.
Mavzuga doir: Indoneziyaning Bali orolida G20 mamlakatlari yetakchilarining sammiti boshlandi
Izoh (0)