Кремль Польшага ракета келиб тушиши билан боғлиқ вазиятда АҚШ ва НАТОни «бош сабаб» деб ҳисоблайди. Россия президенти матбуот котиби Дмитрий Песков шу тариқа АҚШнинг ракета қулаши воқеаси учун Россияни якуний жавобгар деб эълон қилганига муносабат билдирди. Бу ҳақда «РИА Новости» хабар бермоқда.
«Америкаликлар ‘агар у нарса бўлмаганида эди, бу нарса ҳам бўлмасди’ деган парадигма ҳақида айтмоқда. Унда ортга назар ташлашда мантиқ бор. Шунда ҳамма нарсанинг бош сабабини кўрамиз — унинг бошида НАТО ва АҚШ турибди», — деди Кремль вакили.
АҚШ ва НАТОнинг айнан қайси ҳаракатлари ушбу вазиятга сабабчи бўлганига у аниқлик киритмади.
15 ноябрь куни Польша ОАВлари Украина билан чегара яқинидаги Люблинск вилоятининг Пшеводув қишлоғига иккита ракета қулагани ҳақида хабар берди. Ракеталардан бири элеваторга келиб тушди, оқибатда икки киши ҳалок бўлди. Шу куни Россия Украина ҳудудига ёппасига ракета зарбаси берганди.
Украина ҳукумати Польшадаги ҳодисада Россияни жавобгар қилди. Москва айбловларни рад этмоқда. Ғарб мамлакатлари ва Польша ҳукумати ракета Украинага тегишли бўлгани ҳақидаги версияга мойиллик билдирмоқда. Польша президенти Анжей Дуда «бахтсиз ҳодиса» юз берганини тахмин қилди. Унинг сўзларига кўра, катта эҳтимол билан, қулаган ракета Украина ҳаво ҳужумига қарши мудофааси томонидан қўлланилган.
АҚШ, Германия ва Буюк Британия ҳам Польша ракета қулаши билан боғлиқ ҳодиса учун якунда Украина билан уруш бошлаган ва мамлакат фуқаролик инфратузилмасини ўққа тутган Россия масъул эканлиги ҳақидаги баёнотлар билан чиқди.
Изоҳ (0)