Канада ОАВларида Хитой Халқ Республикаси раиси Си Цзиньпин ва Канада бош вазири Жастин Трюдо ўртасида Индонезиядаги G20 саммитида бўлиб ўтган махфий суҳбат мазмуни ҳақида хабарлар пайдо бўлганидан кейин, Сзинпин Трюдони «нолойиқ иш қилганликда» айблади. Бу ҳақда CBC хабар бермоқда.
«Биз муҳокама қилган ҳамма нарса газеталарга тарқалиб кетди, бу номақбул нарса, биз бу ҳақда гаплашмаганмиз», — деди Си икки томонлама суҳбатдан кейин эртаси куни форумда Трюдони учратиб.
Трюдо, ўз навбатида, «Канадада очиқча ва ҳалол мулоқотга ишонишларини» айтди ҳамда Канада ва Хитой бир ёқадан бош чиқармайдиган масалалар борлигига қарамасдан, томонлар конструктив тарзда биргаликда ишлашда давом этишига умид билдирди. Шундан кейин Си: «Келинг, аввал бунинг учун шароитлар яратамиз», — деди. Улар қўл сиқишди ва бир-биридан узоқлашди.
Трюдо ва Си 15 ноябрь куни учрашганди, Сининг бошқа етакчилар билан суҳбатларидан фарқли равишда, бу учрашув норасмий бўлганди. Кейинроқ Канада бош вазири матбуот хизмати пресс-релиз чиқариб, мулоқот чоғида тилга олинган мавзулар ҳақида хабар берди (улар орасида Украинадаги уруш ҳам бор), аммо Сининг ушбу масалалар бўйича позициясига аниқлик киритмади.
ОАВлар хабарларида айтилишича, ХХР раҳбари ва Канада бош вазири Украинадаги урушни, Шимолий Кореяга нисбатан сиёсатни ва Хитойнинг Канададаги сайловларга эҳтимолий аралашуви ҳақидаги масалани муҳокама қилган.
Якуний матбуот анжуманида Трюдо ўз хатти-ҳаракатларини «Канада аҳолисига ўз ҳаракатлари ҳақида очиқ гапиришдан уялмаслиги» билан изоҳлади.
Мавзуга доир: Индонезиянинг Бали оролида G20 мамлакатлари етакчиларининг саммити бошланди
Изоҳ (0)