Германия ва Буюк Британия расмийлари 15 ноябрь куни Польшага тушган ракеталарга «Путин уруши» сабаб бўлганини маълум қилди. Бу ҳақда Reuters хабар берди.
Балида бўлиб ўтган G20 саммитида Германия канцлери Олаф Шольц Россия уруш бошламаса, Польша ҳудудига ракеталар келиб тушмаслигини таъкидлади. У мазкур юз берган ҳодисани тўлиқ текширишга чақирди.
«Буларнинг ҳеч бири Россиянинг Украинага қарши урушисиз, Киев инфратузилмасини кенг миқёсда ўққа тутаётган ракеталарсиз содир бўлмасди», — дейди канцлер.
Британия бош вазири Риши Сунак ҳам худди шундай баёнот билан чиқди.
«Биз ҳаммамиз аниқ тушунишимиз керак, агар Россиянинг Украинага бостириб кириши бўлмаганида буларнинг ҳеч бири содир бўлмасди. Путин урушининг шафқатсиз ҳақиқати шундай. Бу давом этар экан, бизнинг хавфсизлигимиз ва иттифоқчиларимиз хавфсизлигига таҳдид солади», — деди у.
Ўз навбатида, НАТО бош котиби Йенс Столтенберг 16 ноябрдаги баёнотида Россия Польшага қасддан ракета ҳужуми уюштиргани ва альянсга ҳужум қилишни режалаштираётганига ишора қилувчи белги йўқлигини айтди. У Польшага тушган ракеталар Украинага тегишли бўлиши эҳтимоли юқорилиги, аммо бунда Киев айбдормаслигини таъкидлади.
«Агар Россиянинг Украинага қарши уруши бўлмаганида, Польшага ракета ҳужуми бўлмаган бўларди», — деди Столтенберг.
Шунингдек, у Польшадаги воқеадан сўнг НАТОнинг шарқий қанотига қўшимча ҳаво ҳужумидан мудофаа тизимлари жойлаштирилишини қўшимча қилди.
15 ноябрь куни Польшанинг ZET radiosi Украина билан чегарадош Пржеводов қишлоғига иккита ракета қулагани, икки киши ҳалок бўлгани ҳақида хабар берди. Воқеа муносабати билан Польша бош вазири Матеуш Моравецки хавфсизлик ва мудофаа бўйича ҳукумат қўмитасининг шошилинч йиғилишини ўтказди. Россия Хавфсизлик кенгаши раиси ўринбосари Дмитрий Медведев Польшада қулаган ракета билан боғлиқ воқеа Ғарб жаҳон уруши эҳтимолини ошираётганини исботлашини айтди.
Изоҳ (0)