Shavkat Mirziyoyev bolalarni maktabgacha ta’lim bilan qamrab olish darajasi 80 foizga yetkazilishini aytdi

O‘zbekistonda 2025-yilda bolalarni maktabgacha ta’lim bilan qamrab olish darajasini 80 foizga yetkazish uchun barcha zarur choralar amalga oshiriladi. “Daryo” muxbirining xabar qilishicha, bu haqda Shavkat Mirziyoyev Toshkent shahrida o‘tayotgan YUNESKOning Kichik yoshdagi bolalarni tarbiyalash va ta’lim berishga bag‘ishlangan Butunjahon konferensiyasida aytib o‘tdi.

Prezidentning aytishicha, hozirgi vaqtda O‘zbekistonda 10 mingdan ortiq o‘rta ta’lim maktablari faoliyat ko‘rsatmoqda.

“So‘nggi yillarda oliy o‘quv muassasalari soni qariyb 2,5 barobar ko‘payib, 186 taga yetdi. Ularning 31 tasi dunyodagi yetakchi universitet va institutlarning filiallaridir. Oliygohlarga qabul kvotasi 3,5 barobarga ortganini, oliy ta’lim qamrovi esa 9 foizdan 38 foizgacha oshganini qayd etish lozim”, — deydi prezident.

Davlat rahbari maktabgacha ta’lim va maktab ta’limi, oliy ta’lim tizimi hamda ilmiy-madaniy muassasalarni bo‘lg‘usi Renessansning to‘rt uzviy halqasi, deb bilishini ta’kidladi.

“Biz kelgusida ham bu yo‘lda boshlagan ishlarimizni izchil davom ettirib, 2025-yilda bolalarni maktabgacha ta’lim bilan qamrab olish darajasini 80 foizga yetkazish uchun barcha zarur choralarni amalga oshiramiz. Bundan tashqari, BMTning Barqaror rivojlanish maqsadlarida belgilangan ko‘rsatkichlarga erishish doirasida 2025-yilga qadar 6 yoshli bolalarning 100 foizini maktabga tayyorgarlik dasturi bilan qamrab olishni maqsad qilib olganmiz”, — deya qo‘shimcha qildi Shavkat Mirziyoyev.

Mavzuga doir: “O‘zbekistonda so‘nggi yillarda bog‘chalar soni 6 barobarga ko‘paydi, tarbiyachi va pedagoglar soni 160 mingga yetdi” — prezident