O‘zbekistonning Istanbul shahridagi Bosh konsulxonasi 13-noyabrdagi portlash oqibatida yengil darajada shikastlangan O‘zbekiston fuqarolari borligini ma’lum qildi.
Bosh konsulxonaning bildirishicha, Istanbul gubernatorligi bilan bog‘lanib terakt oqibatida yaralangan va shifoxonaga keltirilgan shaxslar haqida ma’lumot oldi. Ular orasida O‘zbekiston fuqarolari qayd etilmagan.
Voqea natijasida yaralangan 81 kishidan 8 nafari xorijiy davlat fuqarolari ekanligi aniqlangan.
Shu bilan birga, rasmiy ma’lumotlarda e’lon qilingan 6 nafar vafot etgan va 81 nafar yaralanganlardan tashqari turli xil yengil darajadagi shikastlar olib shifoxonaga murojaat qilmagan holda tibbiy yordam olgan O‘zbekiston fuqarolari ham borligi aniqlanmoqda. 14-noyabr kuni O‘zbekiston fuqarosi bo‘lgan bloger, jamoatchilik faoli Islam Kaparzo ham yengil darajada shikastlanganini ma’lum qilgandi.
“Vatandoshlarimizdan shaxsiy xavfsizliklariga e’tiborli bo‘lishlarini so‘rab qolamiz”, — deyiladi Bosh konsulxona axborotida.
Portlash Istanbulning Beyog‘lu tumani, Istiqlol ko‘chasida 13-noyabr, yakshanba kuni sodir bo‘lgandi. Bu ko‘cha piyodalar uchun mo‘ljallangan bo‘lib, sayyohlar uchun eng mashhur joylardan biri sanaladi. Istanbul Bosh prokuraturasi voqeani terakt sifatida baholadi. Portlash sodir etgan shaxs qo‘lga olingan.
Shavkat Mirziyoyev portlash oqibatida ko‘plab insonlar qurbon bo‘lgani va jiddiy jarohat olgani munosabati bilan Rajab Toyyib Erdo‘g‘onga ta’ziya yo‘lladi.
Mavzuga doir: Fotoreportaj: Istanbuldagi eng ommabop piyodalar ko‘chalaridan biri — Istiqlol portlashdan keyin
Izoh (0)