Ўзбекистонда 2025 йилда болаларни мактабгача таълим билан қамраб олиш даражасини 80 фоизга етказиш учун барча зарур чоралар амалга оширилади. «Дарё» мухбирининг хабар қилишича, бу ҳақда Шавкат Мирзиёев Тошкент шаҳрида ўтаётган ЮНЕСКОнинг Кичик ёшдаги болаларни тарбиялаш ва таълим беришга бағишланган Бутунжаҳон конференциясида айтиб ўтди.
Президентнинг айтишича, ҳозирги вақтда Ўзбекистонда 10 мингдан ортиқ ўрта таълим мактаблари фаолият кўрсатмоқда.
«Сўнгги йилларда олий ўқув муассасалари сони қарийб 2,5 баробар кўпайиб, 186 тага етди. Уларнинг 31 таси дунёдаги етакчи университет ва институтларнинг филиалларидир. Олийгоҳларга қабул квотаси 3,5 баробарга ортганини, олий таълим қамрови эса 9 фоиздан 38 фоизгача ошганини қайд этиш лозим», — дейди президент.
Давлат раҳбари мактабгача таълим ва мактаб таълими, олий таълим тизими ҳамда илмий-маданий муассасаларни бўлғуси Ренессанснинг тўрт узвий ҳалқаси, деб билишини таъкидлади.
«Биз келгусида ҳам бу йўлда бошлаган ишларимизни изчил давом эттириб, 2025 йилда болаларни мактабгача таълим билан қамраб олиш даражасини 80 фоизга етказиш учун барча зарур чораларни амалга оширамиз. Бундан ташқари, БМТнинг Барқарор ривожланиш мақсадларида белгиланган кўрсаткичларга эришиш доирасида 2025 йилга қадар 6 ёшли болаларнинг 100 фоизини мактабга тайёргарлик дастури билан қамраб олишни мақсад қилиб олганмиз», — дея қўшимча қилди Шавкат Мирзиёев.
Мавзуга доир: «Ўзбекистонда сўнгги йилларда боғчалар сони 6 баробарга кўпайди, тарбиячи ва педагоглар сони 160 мингга етди» — президент
Изоҳ (0)