Istanbuldagi teraktni sodir etishda gumonlanayotgan ayol Suriyaning Kobani shahrida Kurdiston ishchilar partiyasi (KIP)ning razvedka maktabida o‘qigan, u yerda amerikalik harbiylar dars bergan. Bu haqda Yeni Şafak gazetasi xabar bermoqda.
“Albashir so‘roq chog‘ida KIPning Suriyadagi filialiga aloqasi borligini tan oldi. Terrorchi Ayn-al-Arab (Kobani)daKIP razvedka maktabini bitirganini aytib berdi, u yerda amerikalik askarlar ham ta’lim bergan, u maxsus razvedka ofitseri sifatida tahsil olgan”, — deyiladi xabarda.
Bundan tashqari, gumonlanuvchi Ayn-al-Arabda PKK/YPG/SDG tashkiloti rahbarining ishonchli vakili bilan aloqada bo‘lgani, undan ko‘rsatmalar olganini aytgan. Ushbu yo‘l-yo‘riqlarga amal qilib, qiz bundan to‘rt oy avval Afrin-Adlib orqali Turkiyaga noqonuniy kirib kelgan. Politsiya aniqlashicha, er-xotindek ko‘rinish va shubha uyg‘otmaslik uchun, u Istanbulda tashkilot a’zosi bo‘lgan bir erkak bilan birga harakatlangan.
O‘tgan hafta Istanbul markazidagi Istiqlol piyodalar ko‘chasida portlash yuz bergan, olti kishi halok bo‘lib, 81 kishi jabrlangan edi. Teraktni sodir etishda gumonlanib, Ahlam Albashir qo‘lga olingan, u KIP bilan aloqasi borligiga iqror bo‘lgan. IIV ma’lumotlariga ko‘ra, teraktni sodir etish haqidagi buyruq Suriyaning chegara yaqinidagi Kobani shahridan kelib tushgan.
Tintuv chog‘ida qizning yonidan pasport, yirik miqdorda pul, raqamli qurilmalar va terakt uyushtirish bo‘yicha materiallar topilgan. Shuningdek, 21 ta manzilda tintuv olib borildi, jami 50 kishi qo‘lga olindi.
Albashirga uni Gretsiyaga jo‘natib yuborishga va’da berishgan, biroq politsiya qo‘lidagi ma’lumotlarga qaraganda, terakt tashkilotchilari uni Istanbulning o‘zidayoq yo‘q qilmoqchi bo‘lishgan.
Avvalroq Turkiya ichki ishlar vaziri Sulaymon Soylu Istanbuldagi portlash munosabati bilan AQSH tomonidan bildirilgan hamdardlikni Anqara qabul qilishdan bosh tortishini ma’lum qilgan edi.
“Biz Amerika elchixonasidan bildirilgan ta’ziyani qabul qilmaymiz. Biz hech kimga sotqinlik qilmayapmiz, lekin bizga qilinayotgan sotqinlikka ortiq chidab turolmaymiz”, — dedi u va Turkiya hukumati “hujum qayerda muvofiqlashtirilganidan xabardor bo‘lganini” ham ta’kidladi.
“Menimcha bugun AQSH tomonidan e’lon qilingan hamdardlikni qotilning voqea joyiga birinchilardan bo‘lib yetib kelishiga qiyoslash kerak. Va bu ta’ziyaga munosabat juda aniq bo‘ladi. Buni yaqin kelajakda ko‘rasiz”, — degan u.
Ichki ishlar vaziri portlash ortida Kurdiston ishchilar partiyasi tarafdorlari turganini ma’lum qildi. “Bizning hisob-kitoblarimizga ko‘ra, buyruq Kobanidan (Suriya shimolidagi shahar) kelib tushgan, hujum ijrochisi esa Afrindan (Suriya shimoli-g‘arbidagi shahar)… Tergovchilar qo‘lidagi dalillar portlashni ‘Demokratik ittifoq’ partiyasi (Kurdiston ishchilar partiyasining Suriyadagi jangovar qanoti) uyushtirganini ko‘rsatmoqda”, — dedi Soylu.
Izoh (0)