Jurnalist Aziza Qurbonova o‘zining Facebook sahifasiga Uchtepa tumanida gaz bosimi juda pasayib ketganini bildirgan holda rasm joylagach, tuman hokimligi nomidagi akkaunt postga izoh yozib, jurnalistga uning o‘zi tumanga qanday foydasi teggani haqida savol bergandi. Tuman hokimligi axborot xizmati holatga rasmiy munosabat bildirdi.
Unda ta’kidlanishicha, tuman hokimligining Tashkiliy kadrlar guruhi tomonidan o‘rganish o‘tkazilib, haqiqatan ham tuman hokimligining rasmiy sahifasi orqali tuman hokimligi matbuot kotibi To‘rabek To‘rayev tomonidan his-hayajonga berilib yozgan fikrlari tanqid qilingan.
Tumandagi gaz muammosi bo‘yicha 14-noyabr kuni soat 14:30 da tuman gaz ta’minoti korxonasi rahbari tomonidan tushuntirish berilib, muammo 2 ish kuni davomida hal qilishi brifing orqali bayon qilingan. Tuman hokimligi matbuot kotibining sohaga qo‘shgan hissasi va tumandagi bo‘layotgan ijtimoiy-iqtisodiy o‘zgarishlarni tezkorlik bilan yoritishi va bir necha respublika va xalqaro tanlovlarda e’tirof etilgani, qolaversa, bunday e’tirozli holatlarga muqaddam yo‘l qo‘yilmagani va ko‘p yillik tajribasi inobatga olinib, tuman hokimi tomonidan unga ogohlantirish intizomiy jazo chorasi berilgan.
Matbuot kotibining bundan keyingi faoliyatida tuman hokimligi nomidan bildirayotgan fikrlarida jurnalistik etikasiga rioya etishi tushuntirildi. Tuman hokimligi jurnalistlar uchun har doim ochiq va shaffof ekanini va muammoli vaziyatlarda tezkor munosabat bildirishini yana bir bor ma’lum qiladi, — deyilgan bayonotda.Ma’lumot o‘rnida, jurnalist postidan so‘ng “Uchtepa tumani hokimligi” nomi ostidagi profil holatga munosabat bildirgan va olovga yog‘ sepmay, kattalarga hurmat bilan yondashishni tavsiya qilgandi.
Bo‘ldi-da, Azizaxon, nima qilasiz olovga yog‘ sepib? Hamma narsa nazoratga olingan. Qani, bir kun kelib Uchtepada ishlang-chi, ko‘raman. Bas qiling xalq g‘azabini qo‘zg‘atishni. Siz nima qilib berdingiz Uchtepaga? Tepada o‘tirib, aqllilik qilish nechog‘lik oson-a? Men ham siz o‘tirgan joyda anchagina o‘tirganman, lekin bunaqangi kattalik qilib, birovning g‘azabini keltirmaganman, Allohga shukur.Mening ismim — Uchtepa tumani hokimligi va men xalqimning og‘ir va yengil kunlarida ham birga bo‘lib, ular nafas olayotgan havodan nafas olaman, ular yurgan yo‘llardan yuraman, ularning dardi bilan yashayman. Mana men kimman, Azizabonu. Va sizga ham shuni tavsiya qilaman. O‘zingizdan kattalarga hurmat bilan yondashishni tavsiya qilaman, — deyilgan unda.
Ma’lumot uchun, To‘rabek To‘rayev “Yoshlar” telekanali muharriri, Davlat soliq qo‘mitasi, Adliya, Mehnat, Maktabgacha ta’lim vazirliklari axborot xizmati rahbari, Toshkent shahri hokimligi matbuot xizmati koordinatori vazifalarida faoliyat yuritgan. 2021-yildan beri Uchtepa tumani hokimligi matbuot kotibi sifatida ishlab kelmoqda.
Mavzuga doir: “Siz nima qilib berdingiz tumanga?” Uchtepa hokimligi jurnalistning gaz muammosi haqidagi postiga izoh qoldirdi (foto)
Izoh (0)