O‘zbekison adliya vaziri lavozimida ishlab kelgan Ruslanbek Davletov prezident maslahatchisi bo‘ldi.
Davlat rahbari matbuot kotibining xabar qilishicha, u prezidentning ijtimoiy-siyosiy rivojlanish masalalari bo‘yicha maslahatchisi lavozimiga tayinlandi.
Shu munosabat bilan adliya vaziri lavozimidan ozod etildi. Uning o‘rniga kim adliya vaziri lavozimini egallagani hozircha ma’lum qilinmagan.
Oktabr oyining o‘rtalarida Ruslanbek Davletov prezident maslahatchisi etib tayinlanishi, uning o‘rniga Buxoro viloyati prokurori Mahmud Istamov adliya vaziri bo‘lishi haqida xabarlar tarqalgandi. Vazirlik matbuot kotibi bunga izoh berib, adliya vaziri o‘zgarmaganini, Ruslanbek Davletov o‘z ish joyida o‘z xizmat vazifasini bajarayotganini aytgandi.
U Adliya vazirligiga 2017-yilning avgustidan buyon rahbarlik qilib kelayotgandi.
Ruslanbek Davletov 1980-yilida Xorazm viloyatida tug‘ilgan. Ma’lumoti bo‘yicha huquqshunos, iqtisodchi. 2001-yil Buyuk Britaniyaning Varvik universitetini, 2003-yilda Jahon iqtisodiyoti va diplomatiya universitetini (magistratura), 2007-yil Toshkent davlat iqtisodiyot universitetini va 2010-yil Prezident huzuridagi davlat va jamiyat qurilishi akademiyasini tamomlagan.
Mehnat faoliyatini 2001-yilda Monopoliyadan chiqarish va raqobatni rivojlantirish davlat qo‘mitasida yetakchi mutaxassis lavozimida boshlagan. Keyinchalik mazkur qo‘mitada bosh mutaxassis, bo‘lim boshlig‘i vazifasini bajaruvchi bo‘lib ishlagan.
2004—2012-yillarda Vazirlar Mahkamasi Axborot-tahlil boshqarmasi, Huquqiy ekspertiza va xalqaro shartnomalar boshqarmasi yetakchi mutaxassisi, bosh mutaxassisi, 2012—2014-yillarda Oliy sud huzuridagi Sud qonunchiligini demokratlashtirish va liberallashtirish hamda sud tizimi mustaqilligini ta’minlash bo‘yicha Tadqiqot markazi direktori o‘rinbosari, direktor vazifasini bajaruvchisi bo‘lgan.
2014−2016-yillarda Prezident devoni Oliy Majlis, siyosiy va jamoat tashkilotlari bilan hamkorlik qilish xizmati Oliy Majlisi Senati va Qonunchilik palatasi tuzilmalari bilan faoliyatni muvofiqlashtirish sho‘basi mudiri, 2016—2017-yillarda Adliya vazirining birinchi o‘rinbosari, 2017-yil 4-yanvardan 14-avgustgacha Prezidentning jismoniy va yuridik shaxslarning murojaatlari bilan ishlashni nazorat qilish va muvofiqlashtirish bo‘yicha Davlat maslahatchisining 1-o‘rinbosari lavozimlarida faoliyat ko‘rsatgan.
Izoh (0)