Журналист Азиза Қурбонова ўзининг Facebook саҳифасига Учтепа туманида газ босими жуда пасайиб кетганини билдирган ҳолда расм жойлагач, туман ҳокимлиги номидаги аккаунт постга изоҳ ёзиб, журналистга унинг ўзи туманга қандай фойдаси теггани ҳақида савол берганди. Туман ҳокимлиги ахборот хизмати ҳолатга расмий муносабат билдирди.
Унда таъкидланишича, туман ҳокимлигининг Ташкилий кадрлар гуруҳи томонидан ўрганиш ўтказилиб, ҳақиқатан ҳам туман ҳокимлигининг расмий саҳифаси орқали туман ҳокимлиги матбуот котиби Тўрабек Тўраев томонидан ҳис-ҳаяжонга берилиб ёзган фикрлари танқид қилинган.
Тумандаги газ муаммоси бўйича 14 ноябрь куни соат 14:30 да туман газ таъминоти корхонаси раҳбари томонидан тушунтириш берилиб, муаммо 2 иш куни давомида ҳал қилиши брифинг орқали баён қилинган. Туман ҳокимлиги матбуот котибининг соҳага қўшган ҳиссаси ва тумандаги бўлаётган ижтимоий-иқтисодий ўзгаришларни тезкорлик билан ёритиши ва бир неча республика ва халқаро танловларда эътироф этилгани, қолаверса, бундай эътирозли ҳолатларга муқаддам йўл қўйилмагани ва кўп йиллик тажрибаси инобатга олиниб, туман ҳокими томонидан унга огоҳлантириш интизомий жазо чораси берилган.
Матбуот котибининг бундан кейинги фаолиятида туман ҳокимлиги номидан билдираётган фикрларида журналистик этикасига риоя этиши тушунтирилди. Туман ҳокимлиги журналистлар учун ҳар доим очиқ ва шаффоф эканини ва муаммоли вазиятларда тезкор муносабат билдиришини яна бир бор маълум қилади, — дейилган баёнотда.Маълумот ўрнида, журналист постидан сўнг «Учтепа тумани ҳокимлиги» номи остидаги профил ҳолатга муносабат билдирган ва оловга ёғ сепмай, катталарга ҳурмат билан ёндашишни тавсия қилганди.
Бўлди-да, Азизахон, нима қиласиз оловга ёғ сепиб? Ҳамма нарса назоратга олинган. Қани, бир кун келиб Учтепада ишланг-чи, кўраман. Бас қилинг халқ ғазабини қўзғатишни. Сиз нима қилиб бердингиз Учтепага? Тепада ўтириб, ақллилик қилиш нечоғлик осон-а? Мен ҳам сиз ўтирган жойда анчагина ўтирганман, лекин бунақанги катталик қилиб, бировнинг ғазабини келтирмаганман, Аллоҳга шукур.Менинг исмим — Учтепа тумани ҳокимлиги ва мен халқимнинг оғир ва енгил кунларида ҳам бирга бўлиб, улар нафас олаётган ҳаводан нафас оламан, улар юрган йўллардан юраман, уларнинг дарди билан яшайман. Мана мен кимман, Азизабону. Ва сизга ҳам шуни тавсия қиламан. Ўзингиздан катталарга ҳурмат билан ёндашишни тавсия қиламан, — дейилган унда.
Маълумот учун, Тўрабек Тўраев «Ёшлар» телеканали муҳаррири, Давлат солиқ қўмитаси, Адлия, Меҳнат, Мактабгача таълим вазирликлари ахборот хизмати раҳбари, Тошкент шаҳри ҳокимлиги матбуот хизмати координатори вазифаларида фаолият юритган. 2021 йилдан бери Учтепа тумани ҳокимлиги матбуот котиби сифатида ишлаб келмоқда.
Мавзуга доир: «Сиз нима қилиб бердингиз туманга?» Учтепа ҳокимлиги журналистнинг газ муаммоси ҳақидаги постига изоҳ қолдирди (фото)
Изоҳ (0)