Istanbulda 13-noyabr kuni yuz bergan portlashda halok bo‘lgan qurbonlar uchun dafn marosimi bo‘lib o‘tdi. Bu haqda Al Jazeera xabar berdi.
Turkiya politsiyasi hodisa yuzasidan kurd qurolli guruhiga aloqadorlikda gumon qilingan suriyalik ayolni qo‘lga oldi. U Istanbuldagi gavjum ko‘chada bomba qo‘yib ketgandi. Portlash 13-noyabr kuni 16:20 (Toshkent vaqti bilan 18:20) atrofida yuz berdi. Hodisa oqibatida 6 kishi halok bo‘ldi va 80 kishi jarohatlandi. Kurdlar Istanbuldagi teraktga aloqadorlik haqidagi ayblovlarni rad etdi.
Turkiya vitse-prezidenti Fuat Oktay va parlament raisi Mustafo Sentop ham dafn marosimida ishtirok etdi.
Portlash vaqtida ikki yosh bolasini xolasiga qoldirib, Istiqlol xiyobonida sayr qilishga chiqqan Adem Topkara va uning rafiqasi Elif Topkara uchun alohida dafn marosimi o‘tkazildi. Portlash Turkiyada bir necha yil oldin shunga o‘xshash hujumlar sodir bo'lgan paytdagi xavotirni eslatdi. Mamlakat 2015-2017 yillar oralig‘ida qator portlashlarga duch kelgan. Ular ISHID (harakati cheklangan terrorchilik tashkilot) va muxtoriyatga intilayotgan kurd qurolli guruhlari tomonidan sodir etilgan.
Istanbul politsiyasi portlash bo‘yicha o‘z tergovlarini yakunlaganidan so‘ng, terakt yuz bergan Istiqlol shoh ko‘chasini piyodalar harakati uchun qayta ochdi. Odamlar portlash sodir bo‘lgan joyga gul olib kelishni boshladi, ko‘cha esa yuzlab turk bayroqlari bilan bezatilgan.
Ma’lumot o‘rnida, Shavkat Mirziyoyev Turkiyaning Istanbul shahri Beyo‘g‘li tumanidagi Istiqlol ko‘chasida yuz bergan portlash oqibatida ko‘plab insonlar qurbon bo‘lgani va jiddiy jarohat olgani munosabati bilan Rajab Toyyib Erdo‘g‘onga ta’ziya yo‘lladi.
Davlat rahbari vafot etganlarning oila a’zolari hamda yaqinlariga taskin-tasalli va bardamlik, jarohat olganlar tez fursatda sog‘ayib ketishini tiladi.
Mavzuga doir:
- Istanbulda yuz bergan portlash terakt deb baholandi (foto)
- “Ushbu teraktda ayol kishi ishtirok etgani haqida ma’lumotlar bor” — Turkiya prezidenti
- Istanbuldagi portlashda O‘zbekiston fuqarosi jabrlangani ma’lum bo‘ldi
- Istanbuldagi teraktda gumonlanuvchi razvedka maktabida amerikalik harbiylar qo‘lida o‘qigan — OAV
- Turkiya portlash yuzasidan AQSH tomonidan bildirilgan hamdardlikni qabul qilishdan bosh tortdi
Izoh (0)