“Daryo” nashri 15-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Zelenskiy Rossiya bilan yangi Minsk kelishuvlarini imzolamaydi
Ukrainaga yangi va samarali xavfsizlik kafolatlari kerak, Minsk kelishuvlariga qaytish bundan mustasno. Bu haqda Ukraina prezidenti Vladimir Zelenskiy G20 sammitida videomurojaatida aytib o‘tdi.
“Biz Rossiyaning keyinchalik terror va global beqarorlikning yangi seriyasini boshlash uchun o‘z kuchlarini qayta to‘plashiga yo‘l qo‘ymaymiz. Hech qanday ‘Minsk-3’ kelishuvi bo‘lmaydi, chunki kelishuv imzolanishi bilan Rossiya uni buzadi”, — dedi Zelenskiy. Uning so‘zlariga ko‘ra, Rossiya o‘z qo‘shinlarini Ukraina hududidan zudlik bilan olib chiqib ketishi, dunyo davlatlari esa Rossiya energiya resurslari uchun “narx potologini” kelishib olishi kerak.
Ukraina rahbari Kyiv security compact (Kiyev Xavfsizlik shartnomasi) deb nomlangan kelishuv doirasida urushdan keyingi xavfsizlik arxitekturasini yaratishga chaqirdi. Shu bilan birga, u kelishuvlarning Minsk formatiga qaytishni istisno qilmoqda.
Ma’lumot uchun Minsk kelishuvlari Donbassdagi vaziyatni tartibga solish bo‘yicha 2014—2015-yillarda Ukraina, Rossiya va Yevropada xavfsizlik va hamkorlik tashkiloti vakillaridan iborat uch tomonlama aloqa guruhi tomonidan tuzilgan. Ularni Rossiya, Ukraina, Fransiya prezidentlari, shuningdek, Germaniya kansleri qo‘llab-quvvatlagan.
Kelishuvlarda Ukraina sharqidagi mojaro tomonlarining o‘t ochishni to‘xtatish, mojaro zonasi hududiga og‘ir qurollarni joylashtirmaslik va asirlarni “hammasiga hamma” formatida almashish majburiyati mustahkamlangan edi. Indoneziyaning Bali orolida 15-noyabr kuni G20 mamlakatlari yetakchilarining sammiti boshlandi. Indoneziya prezidenti Joko Vidodo sammitdagi birinchi nutqida “urushni tugatish”ga chaqirdi.
Ukraina bo‘yicha Xitoy va Fransiya davlat rahbarlari qanday pozitsiya bildirmoqda?
Xitoy rahbari Si Szinpin va Fransiya prezidenti Emmanuel Makron Ukrainada o‘t ochishni to‘xtatish va tinchlik muzokaralarini qayta boshlashga chaqirdi. Ular bu haqda Indoneziyaning Bali orolida G20 sammiti boshlanishi oldidan bo‘lib o‘tgan muzokaralar chog‘ida aytdi.
Si Szinpinning so‘zlariga ko‘ra, Xitoyning Ukraina inqirozi bo‘yicha pozitsiyasi aniq va izchil. U o‘t ochishni to‘xtatish, harbiy harakatlarni to‘xtatish va tinchlik muzokaralarini qayta boshlash tarafdori. “Xalqaro hamjamiyat buning uchun sharoit yaratishi kerak, Pekin o‘zining konstruktiv rolini davom ettiradi”, — deb qo‘shimcha qildi Xitoy rahbari.
Makron, o‘z navbatida, Si Szinpindan Rossiya prezidenti Vladimir Putinni Ukraina bo‘yicha muzokaralar stoliga qaytarishni so‘radi, deb yozadi Le Monde. Rossiyaning Ukrainadagi bosqini boshlanganidan beri Xitoy neytral pozitsiyani egallab kelmoqda. Mamlakat Ukrainaning hududiy yaxlitligini qo‘llab-quvvatladi, biroq Rossiyaga qarshi sanksiyalar kiritmadi. Sentabr oyida Xitoy tashqi ishlar vaziri tomonlar hech qanday shartlarsiz muzokaralarni davom ettirishi kerakligini aytgan edi. Uning fikricha, ikkala tomon ham mojaroga barham berish shartlarini muhokama qilishi kerak.
Makron, o‘z navbatida, harbiy harakatlar boshlanganidan beri Putinga bir necha bor qo‘ng‘iroq qilib, uni o‘t ochishni to‘xtatishga chaqirdi. AFP Yelisey saroyining yuqori martabali vakiliga tayanib, Fransiya prezidenti G20 dan keyin rossiyalik hamkasbiga qo‘ng‘iroq qilmoqchi ekanini xabar qilgan.
Narendra Modi: “BMT dunyodagi alg‘ov-dalg‘ovlikni eplay olmadi”
Ko‘p tomonlama institutlar, shu jumladan, BMT ham sayyoradagi xaos (tartibsizlik, alg‘ov-dalg‘ovlik) eplay olmadi va muammolarni hal qila olmadi. Bu haqda “Katta yigirmatalik” sammitida Hindiston bosh vaziri Narendra Modi aytib o‘tdi. Uning gaplarini The Indian Express gazetasi keltirdi.
Modi dunyo bugungi kunda to‘qnash kelayotgan muammolar qatorida iqlim o‘zgarishi, koronavirus pandemiyasi, Ukrainadagi voqealar va yetkazib berishlar global zanjirining uzilishini tilga oldi. Uning so‘zlariga ko‘ra, BMT bu muammolarga yechim topa olmagan.
“Biz barchamiz tegishli islohotlarni o‘tkaza olmadik. Shu sababli bugungi kunda dunyoning G20 dan umidlari katta. Guruhimizning dolzarbligi yanada kattaroq ahamiyat kasb etdi”, — dedi bosh vazir. Narendra Modi Ukrainadagi nizoga alohida to‘xtalib o‘tdi. U diplomatiya yordamida o‘t ochishni to‘xtatish va ziddiyatga yechim topishga chaqirdi.
O‘zbekistonning Qirg‘iziston bilan chegara chizig‘idan qancha xonadon ko‘chirilishi ma’lum qilindi
Bosh vazir Abdulla Aripov parlament quyi palatasi yig‘ilishida o‘zbek-qirg‘iz davlat chegarasining yangi belgilanayotgan hududlaridan O‘zbekiston chegara chizig‘idan qancha xonadon ko‘chirilishi to‘g‘risida ma’lumot berdi.
Abdulla Aripovning ta’kidlashicha, yangi chegara chiziqlarini belgilashda O‘zbekiston chegara chizig‘idan 130 ta xonadonni ko‘chirish nazarda tutilmoqda.
Chegarani yangi delimitatsiya va demarkatsiya qilganimizdan keyin, uning himoya, ekspluatatsiya qilish hududlari bor. Bu hududlarda chegara chizig‘idan taxminan 50 metrgacha bo‘lgan qismi ochiladi. Chunki bu yerda chegaraning himoya yo‘lagi tashkil etilishi kerak. Undan keyin ikkita sim to‘siqlari joylashtirish lozim. Albatta, buning o‘z talablari bor. Mazkur talablar bajarilishi uchun ma’lum joylardan odamlarni ko‘chirishga majbur bo‘lamiz.
Hozirgi hisob-kitoblarga ko‘ra, buning uchun taxminan 130 ta xonadonni ko‘chirish nazarda tutilmoqda. U yerdagi aholining hovlisi va uy ichidagi barcha narsalar, hatto daraxtlar narxigacha hisoblangan. Bunga bizdan taxminan 50 milliard so‘m kompensatsiya mablag‘lari ajratiladi.Agar ular xohlasa, uyining mablag‘ini kompensatsiya qilib, to‘lab beramiz. O‘zlari qurib olishlari uchun boshqa yerlardan joy ajratamiz. Yoki ularga yangi qurilgan uylar taklif qilamiz. Agar ular shuni istasa, o‘sha uylardan belgilangan tannarxi qiymatida kompensatsiya hisobidan sotib olish imkonini beramiz. Ya’ni biror odam norozi bo‘lmaydi”, — deya ma’lum qildi bosh vazir.
Izoh (0)