Истанбулда 13 ноябрь куни юз берган портлашда ҳалок бўлган қурбонлар учун дафн маросими бўлиб ўтди. Бу ҳақда Al Jazeera хабар берди.
Туркия полицияси ҳодиса юзасидан курд қуролли гуруҳига алоқадорликда гумон қилинган суриялик аёлни қўлга олди. У Истанбулдаги гавжум кўчада бомба қўйиб кетганди. Портлаш 13 ноябрь куни 16:20 (Тошкент вақти билан 18:20) атрофида юз берди. Ҳодиса оқибатида 6 киши ҳалок бўлди ва 80 киши жароҳатланди. Курдлар Истанбулдаги терактга алоқадорлик ҳақидаги айбловларни рад этди.
Туркия вице-президенти Фуат Октай ва парламент раиси Мустафо Сентоп ҳам дафн маросимида иштирок этди.
Портлаш вақтида икки ёш боласини холасига қолдириб, Истиқлол хиёбонида сайр қилишга чиққан Адем Топкара ва унинг рафиқаси Элиф Топкара учун алоҳида дафн маросими ўтказилди. Портлаш Туркияда бир неча йил олдин шунга ўхшаш ҳужумлар содир бўлган пайтдаги хавотирни эслатди. Мамлакат 2015-2017 йиллар оралиғида қатор портлашларга дуч келган. Улар ИШИД (ҳаракати чекланган террорчилик ташкилот) ва мухториятга интилаётган курд қуролли гуруҳлари томонидан содир этилган.
Истанбул полицияси портлаш бўйича ўз терговларини якунлаганидан сўнг, теракт юз берган Истиқлол шоҳ кўчасини пиёдалар ҳаракати учун қайта очди. Одамлар портлаш содир бўлган жойга гул олиб келишни бошлади, кўча эса юзлаб турк байроқлари билан безатилган.
Маълумот ўрнида, Шавкат Мирзиёев Туркиянинг Истанбул шаҳри Бейўғли туманидаги Истиқлол кўчасида юз берган портлаш оқибатида кўплаб инсонлар қурбон бўлгани ва жиддий жароҳат олгани муносабати билан Ражаб Тоййиб Эрдўғонга таъзия йўллади.
Давлат раҳбари вафот этганларнинг оила аъзолари ҳамда яқинларига таскин-тасалли ва бардамлик, жароҳат олганлар тез фурсатда соғайиб кетишини тилади.
Мавзуга доир:
- Истанбулда юз берган портлаш теракт деб баҳоланди (фото)
- «Ушбу терактда аёл киши иштирок этгани ҳақида маълумотлар бор» — Туркия президенти
- Истанбулдаги портлашда Ўзбекистон фуқароси жабрлангани маълум бўлди
- Истанбулдаги терактда гумонланувчи разведка мактабида америкалик ҳарбийлар қўлида ўқиган — ОАВ
- Туркия портлаш юзасидан АҚШ томонидан билдирилган ҳамдардликни қабул қилишдан бош тортди
Изоҳ (0)