Xerson viloyatidan Rossiya qo‘shinlari olib chiqib ketilgandan so‘ng, u yerda 400 dan ortiq harbiy jinoyatlar hujjatlashtirildi. Ozod qilingan hududlarda Ukraina huquq-tartibot idoralari ham tinch aholi, ham harbiylar orasidan o‘ldirilganlarning jasadlarini topmoqda. Bu haqda Ukraina prezidenti Vladimir Zelenskiy ma’lum qildi.
Xerson viloyatida ham Rossiya armiyasi o‘zidan vahshiyliklarni qoldirdi. Biz har bir qotilni topib, javobgarlikka tortamiz, — dedi Ukraina rahbari urushning 263-kuni yakunlari bo‘yicha videomurojaatida.Zelenskiyning so‘zlariga ko‘ra, 100 mingdan ortiq aholi istiqomat qiladigan viloyatning 226 ta aholi punktida tez orada qonun va tartib qayta o‘rnatiladi.
Biz aloqa, internet, televideniyeni qaytaryapmiz. Elektr va suv ta’minotining normal texnik imkoniyatlarini imkon qadar tezroq tiklash uchun hamma narsani qilyapmiz. Transport aloqasi va pochtani qayta yo‘lga qo‘yamiz. Tez yordam mashinasi va odatiy tibbiy xizmatni qaytaramiz. Hokimiyat, politsiya va ayrim xususiy kompaniyalarning ishini tiklash allaqachon boshlangan, — dedi u.Zelenskiy, shuningdek, Xerson viloyati aholisini hududdagi minalar tufayli mintaqadagi vaziyat xavfli bo‘lib qolayotganidan ogohlantirdi. Uning so‘zlariga ko‘ra, minalardan tozalash jarayonida bir nafar sapyor halok bo‘lgan, yana to‘rt nafari jarohatlangan.
Izoh (0)