Afg‘oniston bilan chegaradagi “Spin-Boldak—Chaman” nazorat o‘tkazish punkti yaqinida sodir bo‘lgan otishma oqibatida Pokiston Chegara qo‘shinidan bir askar halok bo‘ldi, yana ikki nafari yaralandi. Bu haqda hukumat bayonotiga asoslanib Geo News telekanali xabar bermoqda.
Pokiston tomoni ma’lumotlariga ko‘ra, Afg‘oniston xavfsizlik kuchlari nazorat-o‘tkazish punktida navbatchilik qilayotgan pokistonlik chegarachilarga qarata o‘t ochgan. Otishma chog‘ida Pokiston chegara korpusining bir askari halok bo‘lgan, ikki nafari yaralangan. Afg‘onistonlik qurbonlar haqida ma’lumot yo‘q.
Pokiston rasmiylari nazorat-o‘tkazish punkti ishini vaqtincha to‘xtatdi va Afg‘oniston hodisa uchun javobgarlarni ekstraditsiya qilmaguncha, uni qayta tiklashni rejalashtirmayapti. Shu bilan birga, Geo News xabariga ko‘ra, Kobul Pokiston chegarachilariga hujum “Tolibon’ niqobi ostidagi noma’lum terrorchilar tomonidan amalga oshirilgan” degan fikrda.
O‘tgan yil davomida Pokiston bir necha bor Afg‘onistonni chegara hududlarini o‘qqa tutganlikda ayblagan. Bunga javoban Islomobod aprel oyida Afg‘onistonning Xost va Kunar viloyatlariga bir qator aviahujumlar uyushtirgan va oqibatda 50 ga yaqin odam halok bo‘lgan.
Izoh (0)