Sloveniyadagi prezident saylovlarida partiyasiz nomzod, 54 yoshli yurist va huquq himoyachisi Natasha Pirs-Musar g‘olib chiqib, mamlakatda davlat rahbari lavozimidagi ilk ayol kishiga aylandi, deb yozadi “RBK”.
Byulletenlarning 99,99 foizi hisoblab chiqilganidan keyin ma’lum bo‘lishicha, unga saylovchilarning 53,86 foizi ovoz bergan. Uning raqibi — sobiq tashqi ishlar vaziri Anje Logar o‘z mag‘lubiyatini tan oldi, u 46,14 foiz ovozni qo‘lga kiritgan.
Pirs-Musar “hamma uchun prezident bo‘lish”ga, demokratiya va inson huquqlarini himoya qilishga va’da berdi, shuningdek, iqlim o‘zgarishlari ahamiyatini qayd etdi. U Sloveniyani keksalar ta’minlanadigan va tinglanadigan, yoshlar esa qolishni xohlaydigan mamlakatga aylantirish istagini bildirdi.
Natasha Pirs-Musar AQSH sobiq prezidenti Donald Trampning rafiqasi — Melaniya Trampning advokati bo‘lgan, xususan Sloveniyaning Suzy nashri u haqda maqola chiqarganidan keyin ushbu mamlakatda uning manfaatlariga vakillik qilgan. Maqolada AQSH sobiq birinchi xonimi 90-yillarda Nyu-Yorkda Paolo Zampolli model agentligida ishlagani, u esa “badavlat mijozlar uchun eskort agentlik sifatida faoliyat yuritgani” haqida yozgandi.
Bundan tashqari, Edvard Snouden tomonidan Yevroittifoq fuqarolari ma’lumotlari qonunga zid ravishda ishlatilayotgani fosh qilinganidan keyin, Pirs-Musar AQSH bilan muzokaralar olib borgan Yevroittifoq delegatsiyasi a’zosi bo‘lgan.
Rossiya maxsus operatsiyasi boshlanganidan keyin, Sloveniya Yevroittifoqning boshqa mamlakatlari qatorida Ukrainani qo‘llab-quvvatlagan. Sloveniya sobiq bosh vaziri Yanez Yansha mart oyida Kiyevda Ukraina prezidenti Vladimir Zelenskiy bilan ko‘rishgan. Uchrashuvda Polsha va Chexiya bosh vazirlari ham qatnashgan. Ularning tashrifidan maqsadi mamlakatni qo‘llab-quvvatlash uchun keng chora-tadbirlar paketini taqdim etishdan iborat bo‘lgan.
Izoh (0)