Eron sudi Tehrondagi namoyishlar bilan bog‘liq ishlar bo‘yicha hukmlar chiqardi, ayblanuvchilardan biri o‘lim jazosiga hukm qilindi, deb xabar beradi Eronning Mizan agentligi.
Qayd etilishicha, hukmlar dastlabki bo‘lib, ular ustidan shikoyat arizasi berilishi mumkin. O‘lim jazosiga hukm qilingan shaxs hukumat binolariga o‘t qo‘yish, jamoat tartibini buzish, qotillik va milliy xavfsizlikka qarshi jinoyatlarni sodir etish maqsadida til biriktirish, shuningdek, o‘qotar quroldan foydalanishda ayblanmoqda.
Agentlik ma’lumotlariga ko‘ra, ayblanuvchining ismi Saman Saydiy bo‘lib, u to‘pponchani derazadan otib yuborgan, sudda esa qurol unga tegishli bo‘lmaganini aytgan. Yana bir sudlanuvchi Muhammad Gobadlu qotillikda ayblanmoqda. U mashinada bir nechta politsiyachini bosib ketgan, ulardan biri halok bo‘lgan, besh kishi jabrlangan. Gobadlu hukmga rozi bo‘lgan.
Sud jami besh nafar sudlanuvchining ishlari bo‘yicha qarorlar chiqargan, ba’zilarni besh yildan o‘n yilgacha muddatga qamoqqa hukm qilgan.
Avvalroq Eronda 14 ming nafar namoyishchi qatl etilishi mumkinligi, qo‘lga olingan namoyishchilarni qatl qilishga ruxsat beruvchi rezolyutsiya ko‘pchilik ovoz bilan qo‘llab-quvvatlangani xabar berilgandi. 290 deputatning 227 nafari namoyish ishtirokchilariga “qattiqqo‘llik bilan saboq berib qo‘yish”ni yoqlab ovoz bergan. Rezolyutsiya qo‘lga olingan namoyishchilarni qatl qilishga ruxsat beradi.
Erondagi namoyishlarga nima sabab bo‘ldi?
Eronda namoyishlar sentabr o‘rtalarida, 22 yoshli Mahsa Aminiyning o‘limidan keyin boshlandi. Politsiya uni Tehronda metrodan chiqish chog‘ida hijobni noto‘g‘ri o‘ragani uchun hibsga olgan.Keyinroq Aminiyning akasi ma’lum qilishicha, politsiyachilar u bilan “qayta tarbiyalash” ishlarini o‘tkazishga va’da bergan. Politsiya uchastkasidan qiz tez yordam mashinasida olib ketilgan. Shifokorlar qizda yurak xuruji va insult yuz berganini bildirgan, u bir necha kundan keyin vafot etgan. Eron politsiyasi baxtsiz hodisa yuz berganini da’vo qilmoqda.
Eron hukumati fikricha, noroziliklar “islom rejimini zaiflashtirish bo‘yicha dushman strategiyasi”ning bir qismidir, mamlakat armiyasi esa namoyishlar fonida “dushmanlarga qarshi kurashish” va xavfsizlikni ta’minlash niyatida.
Eron oliy yetakchisi Ali Xomanaiy namoyishlar “oddiy eronliklar” tomonidan o‘tkazilmayotganini, balki oldindan rejalashtirilganini aytgandi, shuningdek, u AQSH va Isroilni tartibsizliklarni tashkillashtirishda ayblagandi.
Izoh (0)