Ispaniya poytaxti Madridda tibbiy xizmat sifatining pasayishiga olib kelgan choralarga qarshi 200 mingga yaqin odam namoyishga chiqdi. Bu haqda Deutsche Welle xabar bermoqda.
Tibbiyot xodimlari kasaba uyushmasi ma’lumotlariga ko‘ra, o‘n yil oldin mamlakatdagi moliyaviy inqiroz paytida kiritilgan tejamkorlik choralari sabab Madrid hududidagi birlamchi tibbiy yordam xizmatlari resurs va xodimlar yetishmasligidan so‘nggi yillarda katta bosim ostida bo‘lgan.
Uyushma rasmiylarining ta’kidlashicha, sog‘liqni saqlash sifati yomon boshqaruv tufayli pasaygan, hududiy hukumat davlat va xususiy sog‘liqni saqlash sektorlari o‘rtasida kengroq sheriklik o‘rnatishga imkon beradigan tizimni qayta qurishi kerak.
Rasmiylar, shuningdek, sog‘liqni saqlash markazlarida xodimlarning yetishmasligi tufayli onlayn shoshilinch yordam hajmini oshirishni istaydi.
Namoyishchilar sog‘liqni saqlash sohasiga sarmoya kiritishdan tashqari, Madrid hududiy hukumatining o‘ng qanot rahbari Izabel Dias Ayusoning iste’fosini ham talab qildi.
Mamlakatning chap qanot hukumati norozilikni qo‘llab-quvvatlab, Ayuso boshchiligidagi hududiy hokimiyat Madriddagi sog‘liqni saqlash ustidan “falokatli boshqaruvi” uchun javobgar ekanini aytdi.
“Madrid har bir aholiga sog‘liqni saqlash sohasida eng kam sarmoya kiritadigan hudud. Mamlakatda bu summa o‘rtacha har bir kishi uchun 1700 yevro (1759 dollar)ni tashkil qilsa, Madridda 1300 yevro”, — dedi vazir Feliks Bolanos.
“Ular qilayotgan ish misli ko‘rilmagan falokat. Mutaxassislarni ushlab turishning juda oddiy usuli bor, ya’ni ularga yaxshi munosabatda bo‘lish: ularga nafaqat oylik, balki haftalik dam olish kunlari uchun shartnomalar berish. Hukumat bunga qodir bo‘lmasa, demak bu yerda siyosiy manfaatlar bor”, — dedi chap qanot Mas Madrid partiyasidan siyosatchi Monika Garsiya.
Izoh (0)