Херсон озод бўлди. Украинанинг навбатдаги қадами қандай бўлади? (видео)

9 ноябрь куни Россия қўшинлари Херсон вилоятидан чекинганидан сўнг Украина мазкур ҳудудни ўз назоратига олди.

Херсон аҳолиси украиналик аскарларни катта хурсандчилик билан кутиб олганини алоҳида таъкидлаш керак. Аскарлар ҳузурига минглаб херсонликлар Украина байроқларини кўтариб чиқди.

Ҳолбуки, жорий йилнинг сентябрь ойида Херсон вилоятини Россия таркибига қўшилиши бўйича ўтказилган референдумда 80 фоиздан кўпроқ аҳоли бу қарорни қувватлаб овоз бергани Россия ОАВ томонидан маълум қилинганди. Херсондан чекинишдан аввал Россия қўшинлари шаҳарда бир қанча инфратузилма объектларини портлатиб юборгани аниқланди.

Шундай бўлса-да, Херсонни қайтариб олиниши Украина президенти Владимир Зеленский томонидан катта ғалаба сифатида қайд этилди.

«Бугун тарихий кун — биз юртимизнинг жанубига қайтмоқдамиз. Биз Херсонга қайтдик.

Херсон аҳолиси буни кутаётган эди. Улар ҳеч қачон Украинани тарк этмаган. Украинага бўлган умид ҳар доим ўзини оқлайди ва Украина ҳар доим ўзиникини қайтариб олади», – деди Зеленский видеомурожаатда.

Херсон вилоятидан Россия қўшинлари олиб чиқиб кетилгандан сўнг, у ерда 400 дан ортиқ ҳарбий жиноятлар ҳужжатлаштирилди. Озод қилинган ҳудудларда Украина ҳуқуқ-тартибот идоралари томонидан тинч аҳоли ва ҳарбийларнинг жасадлари топилди.

Йўқотишлар катта бўлгани билан Херсоннинг эгалланиши Украина армиясига катта руҳий куч бермоқда. 14 ноябрь куни Украина президенти Владимир Зеленский Херсонга ташриф буюрди

Херсондаги нутқи чоғида Зеленский Украина тинчлик музокараларига тайёрлигини яна бир бор маълум қилган. «Биз олға интиляпмиз ва тинчликка, бутун мамлакатимиз осойишталигига эришиш учун қадам ташлашга тайёрмиз», — деди Зеленский.

Аммо ҳозирча Россия ва Украина ўртасида музокаралар ўтказиш масаласида олдинга силжиш кузатилмаяпти.