Rossiya tashqi ishlar vaziri Sergey Lavrov G20 sammiti uchun Baliga yetib kelganidan keyin kasalxonaga yotqizildi. Bu haqda Indoneziya rasmiylari orasidagi manbalarga tayanib, Associated Press xabar bermoqda.
Agentlikning ikki suhbatdoshiga ko‘ra, rossiyalik diplomat Balida yurak xastaligi bilan bog‘liq muolaja olmoqda. Vazir Indoneziya oroli janubidagi Denpasar shahrida joylashgan Sanglah kasalxonasiga olib ketilgan.
O‘z navbatida, Bali gubernatori Reuters agentligiga Lavrovning sog‘-salomat ekani va shifoxonaga tibbiy ko‘rikdan o‘tish uchun qisqa muddatga tashrif buyurganini aytdi.
Rossiya Tashqi ishlar vazirligi rasmiy vakili Mariya Zaxarova Lavrovning Balidagi kasalxonaga yotqizilgani haqidagi xabarlarni “feyk” deb atadi. “Sergey Viktorovich bilan Indoneziyada xabarlar lentasini o‘qib, ko‘zlarimizga ishonmayapmiz: u kasalxonaga yotqizilgani aytilmoqda. Bu, albatta, feyk”, — dedi u o‘zining Telegram kanalida.
Zaxarova Telegram’ga vazirning videosini ham joylashtirdi. Tasvir qayerda olingani noma’lum. Videoda Lavrov kasalxonaga yotqizilgani haqidagi xabarlarga izoh berar ekan, G‘arb jurnalistlariga “vijdonliroq bo‘lishni” va “haqiqatni yozishni” tilaydi.
Lavrovning o‘zi kasalxonaga yotqizilgani haqidagi xabarlar fonida “TASS” agentligiga mehmonxonada G20 sammitiga tayyorgarlik ko‘rayotganini aytdi.
Sergey Lavrov 13-noyabr kuni Baliga keldi. U 15—16-noyabr kunlari bo‘lib o‘tadigan G20 sammitida Rossiya delegatsiyasiga boshchilik qiladi.
Rossiya prezidenti Vladimir Putin dunyo yetakchilarining uchrashuvida na shaxsan, na video formatda qatnashmoqda. Kreml buni “uning Rossiyada bo‘lishi zarurati” bilan izohlagan. Bloomberg agentligining xabar berishicha, Putin G20 sammitida boshqa davlatlar rahbarlari bilan ziddiyatga bormaslik uchun qatnashmayapti.
8-noyabr kuni Vladimir Zelenskiyning matbuot kotibi Sergey Nikiforov Ukraina prezidenti sammitda katta ehtimol bilan onlayn ishtirok etishini aytdi.
Izoh (0)