Россия ташқи ишлар вазири Сергей Лавров G20 саммити учун Балига етиб келганидан кейин касалхонага ётқизилди. Бу ҳақда Индонезия расмийлари орасидаги манбаларга таяниб, Associated Press хабар бермоқда.
Агентликнинг икки суҳбатдошига кўра, россиялик дипломат Балида юрак хасталиги билан боғлиқ муолажа олмоқда. Вазир Индонезия ороли жанубидаги Денпасар шаҳрида жойлашган Санглаҳ касалхонасига олиб кетилган.
Ўз навбатида, Бали губернатори Reuters агентлигига Лавровнинг соғ-саломат экани ва шифохонага тиббий кўрикдан ўтиш учун қисқа муддатга ташриф буюрганини айтди.
Россия Ташқи ишлар вазирлиги расмий вакили Мария Захарова Лавровнинг Балидаги касалхонага ётқизилгани ҳақидаги хабарларни «фейк» деб атади. «Сергей Викторович билан Индонезияда хабарлар лентасини ўқиб, кўзларимизга ишонмаяпмиз: у касалхонага ётқизилгани айтилмоқда. Бу, албатта, фейк», — деди у ўзининг Telegram каналида.
Захарова Telegram’га вазирнинг видеосини ҳам жойлаштирди. Тасвир қаерда олингани номаълум. Видеода Лавров касалхонага ётқизилгани ҳақидаги хабарларга изоҳ берар экан, Ғарб журналистларига «виждонлироқ бўлишни» ва «ҳақиқатни ёзишни» тилайди.
Лавровнинг ўзи касалхонага ётқизилгани ҳақидаги хабарлар фонида «ТАСС» агентлигига меҳмонхонада G20 саммитига тайёргарлик кўраётганини айтди.
Сергей Лавров 13 ноябрь куни Балига келди. У 15—16 ноябрь кунлари бўлиб ўтадиган G20 саммитида Россия делегациясига бошчилик қилади.
Россия президенти Владимир Путин дунё етакчиларининг учрашувида на шахсан, на видео форматда қатнашмоқда. Кремль буни «унинг Россияда бўлиши зарурати» билан изоҳлаган. Bloomberg агентлигининг хабар беришича, Путин G20 саммитида бошқа давлатлар раҳбарлари билан зиддиятга бормаслик учун қатнашмаяпти.
8 ноябрь куни Владимир Зеленскийнинг матбуот котиби Сергей Никифоров Украина президенти саммитда катта эҳтимол билан онлайн иштирок этишини айтди.
Изоҳ (0)