Ukrainada bir necha xorijiy matbuot jurnalistlari jangovar zonada ishlash qoidalarini buzgani uchun akkreditatsiya (muayyan hududda ishlash uchun ruxsatnoma)dan mahrum bo‘ldi, deb xabar bermoqda Ukraina Qurolli kuchlari Bosh shtabi.
So‘nggi paytlarda ayrim ommaviy axborot vositalari vakillari mavjud taqiq va ogohlantirishlarga e’tibor bermay, tegishli harbiy qismlar komandirlari va jamoatchilik bilan aloqalar xizmatlarining roziligisiz va Xerson shahrida barqarorlikni ta’minlash bo‘yicha chora-tadbirlar tugallanmay turib u yerda axborot faoliyatini olib bordi. Bunday harakatlar Ukraina Qurolli kuchlari Bosh qo‘mondoni 03.03.2022-yildagi 73-son buyrug‘i talablarini, shuningdek, harbiy qo‘mondonlikning tegishli buyruqlarini qo‘pol ravishda buzish hisoblanadi, — deyiladi shtab xabarida.Bosh shtab aynan qaysi jurnalistlarning ishlash ruxsatnomalari bekor qilinganiga aniqlik kiritmadi.
“Detektor media” nashri manbalariga ko‘ra, kamida olti nafar jurnalist, jumladan CNN va Sky News xodimlari akkreditatsiyadan mahrum qilingan. Ulardan tashqari, Xersonda “Suspilne” va Hromadske tasvirchi guruhlari ishlagan. Bundan tashqari, Rada kanali Xersondan translyatsiya namoyish etgan.
“UNINAN” Telegram-kanalida Sky News jurnalistining Xersondan olgan reportaji chop etildi.
11-noyabr kuni ertalab Rossiya Mudofaa vazirligi Xersondan chekinish haqida xabar berdi. O‘sha kuni kechqurun Ukraina harbiylari Xerson shahri va uning atrofidagi qishloqlarga kira boshladi. Ularni kutib olish uchun minglab aholi Ukraina bayroqlari bilan ko‘chaga chiqdi.
Ukraina prezidenti Vladimir Zelenskiy yaqin orada shaharda “barqarorlashtirish choralari” va minalardan tozalash ishlari boshlanishini, shuning uchun hozircha OAV vakillari Xersonga kiritilmasligini aytdi.
Izoh (0)