Украина президенти Владимир Зеленский 14 ноябрь куни Херсонга ташриф буюрди. Россия президенти матбуот котиби Дмитрий Песков эса мазкур ташрифга муносабат билдирди. Бу ҳақда РИА Новости хабар берди.
Кремль расмийси Зеленскийнинг озод қилинган Херсонга келгани ҳақидаги хабарларга изоҳ беришдан бош тортди.
«Биз буни изоҳсиз қолдирамиз. Бу Россиянинг ҳудуди эканини биласиз», — дейди Россия президенти матбуот котиби журналистларга.
14 ноябрь куни жаҳон ва Украина ОАВлари Украина президенти Владимир Зеленский Херсонга келгани ҳақида хабар тарқатди. Кейинчалик шаҳардан олинган фото ва видео далиллар пайдо бўлди. Уларни Зеленскийнинг ўзи Telegram каналида эълон қилди.
Херсон февраль ойида мамлакатга босқин бошланганидан бери Россия армияси томонидан қўлга киритилган Украинанинг ягона вилояти эди. Сентябрь ойи охирида Кремль Украинанинг Херсон ва Запорожье вилоятларининг босиб олинган қисмлари, шунингдек, ўзини ўзи эълон қилган Донецк ва Луганск халқ республикалари ҳудудларини расман аннексия қилди.
9 ноябрь куни Россия Мудофаа вазирлиги қўшинларни Херсондан Днепрнинг чап қирғоғига олиб чиқишни эълон қилди ва буни шаҳарни тўлиқ таъминлашнинг иложи йўқлиги ва рус аскарларининг ҳаётини сақлаб қолиш истаги билан изоҳлади. 11 ноябрь куни эрталаб вазирлик Херсондан чекиниш ҳақида хабар берди. Ўша куни тушдан кейин украиналик ҳарбийларнинг биринчи бўлинмалари шаҳарга кирди. Зеленский Херсоннинг озод қилиниши ҳақида нутқ сўзлаб, бу тарихий кун эканини таъкидлади.
Изоҳ (0)