Ўзбекистон мусулмонлари идораси раиси, Муфтий Нуриддин Холиқназаров Умра зиёратини амалга ошириб қайтган кишиларни дабдабали маросим ўрнига камбағал оиладан хабар олиш, уларга ёрдам беришни йўлга қўйишга чақирди.
«Муҳтарам Умранинг ниятида юрган ҳожи она, ҳожи оналаримиз. Айни пайтда Каъбатуллоҳ атрофида тавоф қилаётган азизларимиз. Ёки ҳозирги кунда боришни жазм қилиб турган азизларимиз. Келинг, ҳар биримиз ният қилайлик. Агар Аллоҳ таолло мени Каъбатуллоҳ тавофига мушарраф қилса, ёки Пайғамбаримиз Муҳаммад С.А.V. равзаларига бориб намоз ўқишни, ул зотнинг қабрларига қараб саловат-у саломлар айтиш бахтини берса, ушбу ибодатдан қайтиб келганимдан кейин ҳеч қандай риё қилмасликка, исроф қилмасликка, балки ҳеч бўлмаганда икки камбағал оилага қўлдан келганча яхшилик қилишга Аллоҳ насиб қилсин, деб ваъда қилинг.
Агар йилда йилда 70 минг нафар одам Умрага бораяпти десак, ҳозирга қадар 40 мингга яқини борди. Агар ҳар бир 40 минг киши иккитадан камбағал оиланинг бошини силаса, 80 мингта оиланинг хонадонига бахт кириб боради.
Сиз ўзи Умрадан келгандаги тадбир-у маросим, исрофгарчилик, риё, хўжакўрсин маросимга кетадиган харажатни иккита камбағал оила боласининг мактаби учун, таълими учун берсангиз эди. Ёки боласини даволатиш учун, ота-онасини даволатиш учун дори излаётган одамга берсангиз эди. Бугун топгани ошга, нонга етиб, зўрға яшаётган азизларнинг хонадонига ўша хурсандчиликни киргазганингизда эди, унинг савоби бу дабдабабозликдан чандон чандон кўп бўлар эди.
Шунинг учун азизлар, келинг шу ниятимизни амалга оширайлик. Ҳар бир умрачи қайтиб келгандан кейин ҳеч бўлмаганида иккита, қодир бўлганича, балки ўнталаб камбағал ва фақир оиладан хабар олиш шиорини олға сурайлик. Ва бу ниятимизга Аллоҳ мувофиқ айлаган бўлсин», — деди Муфтий Нуриддин Холиқназаров.
Мавзуга доир:
Изоҳ (0)