Калифорниянинг Алтадена шаҳридаги Joe’s Service марказидан Powerball лотерея чиптасини сотиб олган омадли кишига жекпот чиқди ва у 2,04 миллиард доллар ютиб олди. Бу тарихдаги энг йирик лотерея ютуғи. Аммо ғолиб миллиардерлар сафига кира олмайди. Чунки АҚШда лотерея ютуғи — солиққа тортиладиган даромад. Айни дамда кўпчилик ютуқ эгаси икки миллиарддан қанчасини уйга олиб кетиши билан қизиқмоқда.
Powerball ғолиби пулни қандай тартибда олишини ўзи танлаши мумкин: бир марталик тўлов ёки бўлиб-бўлиб олиш. Агар ғолиб бир марталик тўловни танласа, унга бериладиган маблағ мукофотнинг фақат ярмини ташкил қилади, яъни у 997,6 миллион доллар олади. 2,04 миллиард долларни тўлиқ олиши учун ғолиб 30 йиллик бўлиб тўлаш режасини танлаши керак. Бу йилига тахминан 68 миллион долларга тушади. Буларнинг барчаси солиқларни ҳисобга олмаганда.
Powerball ғолибларининг аксарияти бир марталик тўловни танлайди. 2,04 миллиард долларлик ютуқда пул ҳақиқатан ҳам 997,6 миллион долларни ташкил этади, аммо ғолиб бунча пулга чек олмайди. Powerball ютуғининг 24 фоизи (239 424 000 доллар) солиқ сифатида ушлаб қолиш учун IRS (АҚШ Ички даромад хизмати)га ўтказилади. Бунда ғолибга 758 176 000 доллар қолади. Бироқ энг юқори солиқ ставкаси 37 фоизни ташкил қилади — Powerball’ни ютиб олган одамнинг даромади эса ушбу тоифага киради. Шундай қилиб, 2023 йил 15 апрелда ютуқ эгаси ушлаб қолинган 24 фоиз ва 37 фоиз солиқ ставкаси ўртасидаги фарқни ёпиш учун IRS’га 129 688 000 доллар миқдорида чек ёзиши керак. Натижада, федерал даромад солиғидан кейин унда 628 488 000 доллар қолади.
Кейинчалик ғолибнинг давлат солиқлари лотереядаги ютуғига қараб ортиши мумкин. АҚШнинг аксарият штатларида ўз даромад солиғи бор, Калифорнияда бу 13,3 фоизни ташкил қилади. Аммо лотерея эгаси ушбу штатдан бўлса, унга яна бир омад кулган, чунки Калифорния солиқ қонунчилиги бўйича Powerball ютуқлари штатда солиқдан озод қилинган. Агар Калифорния ютуқни солиққа тортганида, бунга яна 132,7 миллион доллар кетган бўларди. Агар лотерея ғолиби Powerball ютуқларини солиққа тортадиган бошқа штатда истиқомат қилса, унинг солиқ тўлови ўсишда давом этиши мумкин.
Изоҳ (0)