Tojikiston Mudofaa vazirligi chaqiruv kampaniyasining bir oyi davomida mamlakat Qurolli kuchlariga chaqiriq bo‘yicha reja 70 foizga bajarilganini ma’lum qildi, deb yozadi Asia Plus Tojikiston Bosh prokuraturasi saytiga tayanib.
Bu yil kuzgi chaqiruv davrida 124 nafar amaldor va davlat xizmatchilarining o‘g‘illari ham armiyaga xizmat o‘tashga ketdi. Ular orasida Fayzaobod, Tojikobod, Rasht tumanlari va Boxtar shahri rahbarlari, shuningdek, Bosh prokuratura hisob-moliya bo‘limi boshlig‘i, Jaloliddin Balxiy, Mo‘minobod tumanlari prokurorlari, Ko‘lob shahri gazrnizoni harbiy prokurorining o‘g‘illari bor.
Ta’kidlanishicha, o‘tgan yili kuzgi chaqiruv kampaniyasi doirasida mansabdor shaxslar hamda boshqa davlat xizmatchilari va ishchilarining oilalaridan 299 kishi, bahorgi chaqiruv davrida esa shunday oilalardan 120 kishi armiyaga chaqirilgan.
“Bundan tashqari, shahar va tuman prokuraturalari, harbiy garnizonlar ishchilari ko‘magida fuqarolar o‘z ixtiyori bilan chaqiruv punktlariga keldi va harbiy xizmatga jo‘nadi, — deyiladi Bosh prokuratura xabarida. — Yildan-yilga armiyada xizmat qilishdan bosh tortayotgan kishilar soni qisqarmoqda, harbiy xizmatni o‘z ixtiyori bilan o‘tash istagidagi fuqarolar esa ko‘paymoqda”.
Eslatib o‘tamiz, Tojikiston mudofaa vaziri Sherali Mirzo mamlakat armiyasiga chaqiruv kampaniyasiga tayyorlanishga bag‘ishlangan yig‘ilishda mansabdor shaxslarning farzandlarini harbiy xizmatga jalb qilish bo‘yicha qat’iy topshiriq bergan edi.
Kuzgi chaqiruv kampaniyasi 1-oktabrda boshlangan bo‘lib, ikki oy davom etadi.
Nashr qayd etishicha, har yili harbiy xizmatga chaqiruv boshlanishi bilan, ijtimoiy tarmoqlarda yoshlarning xizmatga jalb qilinish uchun qo‘lga olinishlari aks etgan videolar tarqaladi, bu xalq orasida “ov” deb ataladi.
Mudofaa vazirligi “ov” uyushtirilishini doim rad etib kelgan, chaqiruv qog‘ozini olib, harbiy komissariatga kelmagan yoshlarni esa militsiya majburiy ravishda u yerga olib borishga haqli ekanini ta’kidlagan.
Izoh (0)